Nógv vóru av teirri fatan, at kappingin um at teir bólkarnir, sum fóru at stríðast um at sleppa víðari frá Prix
Føroyar undanumfarinum í Miðvági leygarkvøldið, vóru serliga MC Hár, Crumb, og eisini helt onkur, at
Bimbs hevði ein góðan møguleika.
Ljóðroyndin vísti vinnaran
Tveir av limunum í MC Hár, trummusláarin Petur Dalsgaard og gittarleikarin Niels Arge Galan, søgdu, eftir at
avgerðin var fallin leygarkvøldið, og MC Hár var sloppið í finaluna, at teir vóru allatíðina sannførdir um, at
teir noyddust at stríðast um annaðplássið.
Niels sigur við Yngd, at teir undir ljóðroyndunum tíðliga um dagin gjørdust sannførdir um, at Clickhaze fór at
vinna kappingina, tí tey vóru í serflokki. Hjá MC Hár galt bara um at ogna sær annaðplássið, so teir sluppu í
finaluna. Sjálvir roknaðu teir við, at tað vóru teir og serliga Crumb, sum fóru at berjast um hetta seinasta
plássið.
Tá ið so avgerðin kom, og frásøgumaðurin, Leif Láadal, á pallinum kunngjørdi, at MC Hár var sloppið í
finaluna, hoyrdust bara nøkur ýl av ovfarakæti, sum limirnir í MC Hár komu við. Teir komu upp á pallin og
spældu eitt eykalag, og teir báðir rappararnir, Allan Mortensen og Niels Uni Dam, gjørdu ikki mætari enn at
lata seg úr so at siga øllum klæðunum, tó ikki tí allarseinasta plagginum.
Eitt positivt yvirraskilsi
Limirnir í MC Hár høvdu ikki so góðan hug til at tosa um seg sjálvar. Ístaðin høvdu teir betur hug til at tosa
um vinnandi bólkin, CLickhaze, sum teir søgdu, var eitt deiligt positivt tónleikayvirraskilsi, ið man alt ov
sjálvdan fær í Føroyum.
Niels Uni Dam sigur, at Clickhaze er besti føroyski tónleikabólkurin, ið hann nakrantíð hevur hoyrt. Víðari
sigur Niels Uni, at bólkurin helst verður eitt tað besta boðið upp á ein føroyskan tónleikabólk, ið kann sláa sítt
navn fast uttanlanda.
Tónleikastílurin skiftir
Tað er ein nógvar ábendingar um, at tónleikstílurin í Føroyum er við at skifta, sigur Niels Uni Dam.
Hann heldur, at føroyingar sum heild eru við at fara frá tí gamla 80'ara tónleikinum og yvir til tann meiri
rokkuta 90'ara tónleikin, og tað er so sanniliga upp á tíðina, leggur Niels Uni Dam aftrat.
Niels Arge Galan heldur eisini, at tað er meiri rættvíst við dømingini í Prix Føroyar nú, tí at áhoyrararnir ikki
eru við til at døma. Ikki tí at teir hildu seg verða illa móttiknar í Miðvági, heldur tvørturímóti. Niels Uni Dam
segði, at áhoyrarafjøldin í Bygdarhúsinum í Miðvági leygarkvøldið var besta áhoyrarafjøld, sum MC Hár
nakrantíð hevði spælt fyri. Trupulleikin, við at áhoyrarar døma, er, at tá fáa teir lokalu bólkarnir altíð nógv
flest atkvøður, sum aðrir bólkar ikki fáa.
Finalan verður eitt brak
Tað er eingin ivi um, at MC Hár gleðir seg til finaluna um Prix Føroyar í Norðurlandahúsinum, og teir siga
eisini, at tey, sum verða í Norðurlandahúsinum tað kvøldið, kunnu vænta sær okkurt heilt serligt frá
bólkinum, sum jú er kendur fyri sína upptraðkan, ið sum oftast fer út um tey mørk, sum vanligi føroyingurin
hevur, men hvat ger tað?
