Meiri enn helmingurin er útlendskur

Tað var tann tíð, tá ið mest sum allir venjararnir í bestu deildini, sum vóru í fulltíðarstarvi, vóru útlendingar. So koppaði tað av álvara á, tá ið FSF fór undir at útbúgva venjarar, og okkurt árið vóru mest sum allir venjararnir í bestu deildini føroyingar.

Kanska er tað tilvild og ikki eyðsýnt rák, men tað er ein veruleiki, nú øll feløgini, sum eru umboðað í bestu deildini hava avgreitt venjaraspurningin, at meiri enn helmingurin av venjarunum eru útlendingar.

Fýra føroyingar eru venjarar í bestu deildini. Teir eru Dan Brimsvík, Jákup á Borg, Sigfríður S. Clementsen og Jóhan Petur Poulsen.

Seks útlendingar eru nú venjarar í bestu deildini. Tríggir eru danir, ein er norðmaður, ein er svenskari, og ein er úr Serbia. Hesin síðsti er ÍF venjarin Aleksandar Jovevic, ið sambært faroesoccer.com hevur búð í Føroyum síðani í 2003, tá ið hann spældi á Skála.

Nógv tey flestu árini, inntil hann gavst at spæla, umboðaði hann ÍF (2006 – 2017). Í 2014 og 2015 bæði spældi og vandi hann í Fuglafirði, har hann er búsettur. So vandi hann KÍ kvinnurnar í 2016 og 2017. Í 2018 vandi hann næstbesta liðið hjá B68, í 2019 vandi hann næstbesta HB liðið, í 2020 og 2021 var hann hjálparvenjari á Toftum, og í 2022 vandi hann ÍF liðið, sum flutti upp úr næstbestu deildini, og nú verður takið hjá honum og ÍF at varðveita plássið í fremstu røð.  

Venjarar í Betri deildini í 2023

Fyrsta umfar í landskappingini verður fyrsta vikuskiftið í mars:

Leygardagin 4. mars

07 Vestur – ÍF

Sunnudagin 5. mars

KÍ – TB

HB – B68

Víkingur – B36

EB/Streymur – AB