Tað skrivar Landssjúkrahúsið á Facebook síðuni.
Mortan greiðir frá, at tað var ein gamal starvsfelagi, sum gav honum íblástur til at melda seg til blóðgeva.
– Og so fekk man eina øl aftaná, sigur Mortan flennandi.
Mitt í 80-unum var tað vanligt, at blóðgevar fingu sær eina øl eftir blóðgávu.
Mortan minnist, at tað var Marita Simonsen, fyrrverandi formaður og stovnari av Felagnum Blóðgevi, ið tappaði Mortan fyrstu ferð, hann gav blóð.
Blóðbankin hevði tí syrgt fyri, at tað var júst hon, ið tappaði hann fyri 100. ferð.
Mortan gav blóð fyrstu ferð í 1986, og hevur Mortan Simonsen øll hesi árini verið trúfastur blóðgevi bæði í Føroyum og í Danmark, og kann nú kalla seg: »Triði blóðgevi í Føroyum, sum hevur givið blóð 100 ferðir«.
##med2##
– Hetta er eitt ómetaliga flott avrik, sum tey mongu, ið hava fingið blóð, eru sera takksom fyri, skrivar Landssjúkrahúsið.
Gávan, sum Felagið Blóðgevi letur í hesum sambandi, er ein glasfuglur frá Mikkalina Glas.
Fuglurin ímyndar eina pelikan, sum í fleiri londum er ímyndin av blóðgevagerninginum.
Søgan sigur, at pelikanurin roytir fjarðarnar av sínum egna brósti til blóðið rennur, so veiku ungarnir kunnu styrkjast við at drekka tað.
– Blóðbankin og Felagið Blóðgevi takka Mortani fyri trúgvan og góðan stuðul í Blóðbankanum og ynskja honum alt tað besta í framtíðini, skriva tey.
Ynskir tú at geva blóð, so melda til á www.gevblod.fo
##med3##
