Myndir: Nógv fólk og gott veður á Ovastevnu

Nógv fólk og nógvir bátar hava leitað sær til Nólsoyar í dag

Tað er av allar besta veðri í Nólsoy í dag, sólin sær, og tað er stilt og lýtt. Ternan siglir í pendulfart við fólki í allan dag og í alla nátt. 

Skráin er fjølbroytt. Stevnan er fastur táttur á summarskránni hjá nógvum føroyingum, um 5000 stevnugestir vóru á ovastevnu í fjør. Strandferðslan ger eitt stórt arbeiði og Ternan siglir at kalla hvønn tíma frá kl 10.00 leygarmorgun til kl. 05.00 sunnumorgun. Ferðaætlanin hjá Ternuni sæst á ssl.fo.

 

##med2##

Keiin er miðdepilin á stevnuni. Tað er á keiini, stevnan varð sert, og í ár var tað  sjónleikarin Gunnvá Zachariasen, sum setti stevnuna. Á keiini er matsøla, listaframsýning, útimøti, stand up og tónleikaframførslur av ymsum slagi. Har er tjaldið við tónleiki, dansi og ølsølu. Tá farið er at skýma verður felagssangur, eisini á keiini. Nógvu bátarnir, sum liggja á víkini, eru eisini við til at skapa ein serligan ovastevnudám. Hóast tað mesta fer fram á keiini, kann sigast at tað er lív í allastaðni. 

 

##med3##

Tiltøkini fyri børn eru við fótbóltsvøllin á Mýrini og á frálíka sandinum á Malarenda. Børnini kunnu leita eftir krabbum, tey kunnu eisini vassa ella svimja á sjónum, tey kunna fara á barnabasar og annars spæla frítt. Forvitnisliga bygdasavnið við Brunn hevur opið, í kirkjuni verða konsertir, andakt og guðstænasta, undir Botnagarði verður kórsangur, handilin í bygdini hevur opið og heimavirkið letur dyrnar upp. Í Royndarhúsinum er kabarett, á flakavirkinum er sangleikur. Út á kvøldið er dansur í Royndarhúsinum og føroyskur dansur í Avhaldshúsinum. Hetta er bara ein partur av øllum tí tú kanst uppliva um vikuskifti í Nólsoy, og sum skilst er heilt víst okkurt til øll. 

##med4##

 

Nevndin, sum skipar fyri ovastevnuni, hevur lagt dent á, at stevnan skal vera fyri alla familjuna, og tiltøkini so vítt møguligt skulu vera ókeypis. Hetta ber millum annað til, tí flest øll fólk í Nólsoy taka lógvatak saman um at fáa hetta at bera til. Ein rúgva av sjálvbodnum fólkum eru í sving alt vikuskifti, og her er talan um bæði stórar og smáar uppgávur. 

 

##med5##

 

Stevnan til minnis um Ova Joensen, hevur knapt 30 ár á baki og hvørt ár gleðir bygdafólki seg til stevnuna.

 

##med6##

 

##med7##

 

##med8##

 

##med9##

 

##med10##

 

##med11##