Tað er so stórur spenningur í Effo-deildini, sum tað sjáldan man hava verið.
Í botninum eydnaðist tað 07 Vestur at vinna 1-0 á Skála. Harvið eru tað trý stig frá 07 Vestur og fram til Skála. Tað eru bara hesi bæði, sum í løtuni eru við í kappingini um at vinna triðaftasta plássið, sum ber bjarging frá niðurflyting við sær. ÍF tapti 5-2 í Gundadali ímóti B36. Harvið er ÍF greitt aftast og við kós ímóti niðurflyting.
B36 sigurin var tann fimti á rað, og nú er árstalsfelagið bara trý stig frá bronsuplássinum.
Í toppinum heldur Víkingur tørn um oddasessin, men tað er meiri spennandi, enn tað var undan hesum umfarinum. Víkingur tapti 3-1 á heimavølli ímóti HB, sum harvið hevur vunnið bæði ímóti KÍ og Víkingur.
Við Margáir vann EB/Streymur 2-1 ímóti KÍ. Stóri maðurin í Streymnesi var Arnbjørn Hansen. Hann varð innskiftur dygst undan, at KÍ legði seg framum við máli, sum Jóannes K. Danielsen, ið fyri fyrstu ferð var millum teir fyrstu ellivu á KÍ liðnum, skoraði. Arnbjørn Hansen bæði javnaði til 1-1 og skoraði sigursmálið. EB/Streymur er við sigrinum mest sum leyst av stríðnum um at sleppa undan niðurflyting. Tað eru sjey stig frá 07 Vestur og fram til EB/Streym, sum nú er á sætta plássi - eitt stig frammanfyri Suðringar.
KÍ hevur framvegis ongantíð vunnið við Margáir. Miðvallarálitið Semir Hadzibulic varð vístur av vøllinum og verður ikki við ímóti Víkingi fríggjakvøldið.
Stóra hálið í dag gjørdi NSÍ, sum vann trivaligan 4-0 heimasigur ímóti Suðringum.
Úrslitini við Margáir, í Sarpugerði og við Løkin bera við sær, at NSÍ nú hevur av álvara meldað seg inn í FM kappingina. NSÍ trýsti við sigrinum KÍ aftur á triðja plássið, og tað eru bara tvey stig fram til Víking.
Fríggjakvøldið hittast KÍ og Víkingur í Klaksvík, og leygardagin skal NSÍ spæla í Gundadali ímóti sera væl upplagda HB.
Víkingur-HB 1-3 (1-1)
1-0: Fróði Benjaminsen
1-1: Øssur Dalbúð
1-2: Jóhan Troest Davidsen
1-3: Aleksandar Stankov
NSÍ-Suðringar 4-0 (3-0)
1-0: Pól Jóhannus Justinussen
2-0: Jann Benjaminsen
3-0: Pól Jóhannus Justinussen
4-0: Petur Knudsen
Skála-07 Vestur 0-1 (0-1)
0-1: Ken Fagerberg
EB/Streymur-KÍ 2-1 (0-0)
0-1: Jóannes K. Danielsen
1-1: Arnbjørn Hansen
2-1: Arnbjørn Hansen
B36-ÍF 5-2 (1-0)
1-0: Róaldur Jakobsen
2-0: Meinhard E. Olsen
3-0: Høgni Eysturoy
3-1: Kristoffur Jakobsen
4-1: Patrik Johannesen
5-1: Patrik Johannesen
5-2: Niels Pauli Danielsen
Víkingur 35
NSÍ 33
KÍ 32
B36 29
HB 24
EB/Streymur 21
Suðringar 20
Skála 17
07 Vestur 14
ÍF 6
Átjanda umfar
Fríggjakvøldið
KÍ-Víkingur
Leygardagin
ÍF-Skála
07 Vestur-EB/Streymur
HB-NSÍ
Suðringar-B36
