Í Skálavík fegnast borgarstjórin, Linjohn Christiansen, um, at fólkatalið í bygdini aftur er farið at veksa.
Hann vísir til tøl hjá Hagstovu Føroya yvir gongdina seinasta árið, sum vísir, at nú veksur fólkatalið aftur í Skálavík.
- Frá 1. august 2023 til 1. august 2024 løgdust níggju fólk aftrat í Skálavíkar kommunu - úr 135 íbúgvum til 144 íbúgvar.
Linjohn Christiansen sigur, at hetta sambært Hagstovu Føroya er ein vøkstur á 6,7 prosent.
Og nú er gongd komin á vøksturin, tí tað eru eisini fólk flutt í kommuna, síðan hesi tølini hjá Hagstovu Føroya.
- Eftir 1. august 2024 eru enn fleiri borgarar lagstir aftrat í kommununi, og vit fegnast um gongdina, sum nú er, sigur borgarstjórin.
Í Sandoynni sum heild vaks fólkatalið í øllum kommunum í nevnda tíðarskeiði - uttan í Sands kommunu.
Í Skálavík eru tey sjálvsagt spent eftir at vita, hvat tað kemur at merkja fyri fólkatalið, at Mark nú byggir 10 nýggjar íbúðir í bygdini.
Íbúðirnar komu til landið herfyri.
Seinastu dagarnar eru stóru elementini koyrd úr Havn til Skálavíkar, har tær fyrstu íbúðirnar nú eru komnar upp at standa.
##med2##
