Í dag hevur ukrainski forsetin, Volodymyr Zelenskyj, verið í London og fundast við ríkis-og stjórnarleiðararnar í Stórabretlandi, Fraklandi og Týsklandi.
Sambært tíðindastovuni NTB umrøður forsetin fundin í dag sum "produktivan", og sum skilst verður nýggja uppskotið, sum Zelenskyj og teir tríggir eru samdir um, sent USA í morgin.
Sagt verður, at hetta er eitt uppskot í 20 punktum um, hvussu kríggið millum Russland og Ukraina kann fáa ein enda, men einki verður sagt um, hvat stendur í uppskotinum.
Fundurin millum Volodymyr Zelenskyj, Friedrich Merz, Keir Starmer og Emmanuel Macron var í Downing Street í London.
Tíðindastovan AFP veit í kvøld at siga, at ukrainski forsetin fer á vitjan í Italia, eftir fyrst at hava vitjað í Brüssel í Belgia í kvøld.
Tað vóru Nato-leiðarin, Mark Rutte og ES-leiðararnir, Antonio Costa og Ursula von der Leyen, sum í kvøld skuldu taka ímóti Volodymyr Zelenskyj í Brüssel.
