Tað eru aftur ísraelsk álop í kvøld í sunnara útjaðaranum av høvuðsstaðnum í Libanon, Beirut.
Tað upplýsa libanesiskir almennir miðlar sambært tíðindastovuni AFP.
- Bumbuflogfør hjá fíggindanum hava framt tvey álop móti suðurbýarpartinum, skrivar almenna tíðindastovan NNA í Libanon.
Fráboðanin kemur stutt eftir, at ísraelski herurin bað borgarar í Suðurbeirut - har Hizbollah er sterkt - fara úr fleiri økjum.
Álop hava verið móti suðurpartinum av Beirut í fleiri dagar á rað.
##med2##
Bæði í nátt og í morgun vóru tað júst sunnaru útjaðararnir, sum vóru útsettir fyri álopum, sum NNA nevndi harðligastu bumbuálopini móti sunnaru útjaðaranum higartil.
Eftir næstan dagliga at hava skoti yvir markið til Libanon, hevur Ísrael økt munandi um álopini móti Hizbollah, sum er týdningarmesti felagi hjá Iran í økinum.
Ísrael hevur framt fleiri loftálop og innrás á landi í Suðurlibanon.
Yvir 2.000 eru dripin í bardøgum seinasta árið, upplýsti heilsumálaráðið í Libanon sunnudagin, sambært tíðindastovuni Reuters. Nógv tey flestu eru deyð í bardøgunum seinastu vikurnar.
/Ritzau/
