Oddagrein: Avgjalds-øðin yvirtikið Fólkaflokkin

Kanska tað er hetta, sum ger um seg hjá for­manni Fólkafloksins, sum ætlar at leggja ein hóp av avgjøldum á fólkið og vinn­una í Føroyum.

Tað verður dýrari at keypa bensin, tí Jørg­en leggur hægri avgjald á bensinið. Tað verð­ur dýrari at keypa diesel, tí Jørgen legg­ur hægri avgjald á diesel. Tað verður dýrari at keypa streym frá SEV, tí Jørgen leggur hægri avgjald á oljuna hjá SEV. Tað verður dýr­ari at eiga bil í Føroyum, tí Jørgen leggur hægri avgjald á vegskattin á allar bilar í Føroyum, bæði teimum hjá privatum og hjá vinnuni.

Hesi avgjaldsherðindi, ella »avgjalds­øðin«, sum Jørg­en Niclasen sjálvur kallar slíkt, skulu leggj­ast á fólkið í Føroyum, so­leið­is at tað verður ó­keypis at koyra í­gjøgn­­um Vága­tunn­lin og Norðoyatunnil­in og til at dekka und­­ir­­skot­ið hjá Eyst­ur­oy­ar­tunl­i­num.

So­leiðis kann tað ganga. Einaferð segði Jørg­­en Niclasen soleiðis um undanfarna lands­­stýrið:

»Heldur enn at steðga út­reiðslu­gildi­­num, ætlar landsstýrið koma við nýggj­ari skatta- og avgjaldsøði á føroysku fam­ilj­ur­­nar og vinnuna«.

Hann hevur eisini sagt: »Avgjaldsøðin hjá reyðu samgongu heldur fram. Míni ráð eru ein­føld. Steðgið avgjaldsøðini nú«.

Og Elsebeth Mercedis tók undir við Jørg­en. Hon segði millum annað soleiðis:

»Reyða samgongan kennir eingi mørk í síni skatta- og avgjaldsøði. Fyrst var ben­sin- og dieselgjald hækkað og eisini veg­skatt­ur­in var hækkaður. Avgjaldsstopp Nú, Takk!«

Og so segði Mercedis eisini hesi vís­dóms­orð­ini:

»Fólkaflokkurin fer ikki undir nøkrum um­støð­um at hækka, ella innføra nýggj gjøld. Heldur ikki avgjald á brennievnið. Fólka­flokk­urin sigur kortanei til fleiri av­gjøld!«

Ikki er gott at vita, um Jørgen og Mer­ce­dis eru vorðin óð í høvdinum. Men av­gjalds­øð­in hevur so sanniliga tikið valdið á teimum og Fólka­flokk­inum.

Sum skilst er tó onkur í flokkinum, sum ikki tekur undir við avgjaldsøðini hjá Jørg­en Niclasen. Livst so spyrts.