Nógv hevur verið tosað um, hvørt virðið á bankanum er ov lágt ella ov høgt. Sum støðan er nú bendir alt á, at sera stórur áhugi er fyri bankanum, og tað bendir so aftur á, at kursurin er í lægra lagi.
»Hvat er ein milliard millum vinir« spurdi fyrrverandi foramaðurin í Búskaparraðnum, Hermann Oskarsson, herfyri, tá serfrøðingar høvdi mett virðið á bankanum at verða á leið tvær milliardir krónur. Henda útsøgn fekk nógvar politikarar at ressast við og at krevja broytingar í tilgongdini at selja bankan.
Men einki varð broytt, og nú bankin loksins er farin til sølu, er virðið áleið hesar somu tvær milliardir. Kursurin verður í mesta 189. Hinir peningastovnarnir mæla fólki til at keypa, tí kursurin er »góður« - og útlit eru fyri skjótum vinningi við aftur at umseta partabrøvini til pengar lutfalsliga skjótt.
Alt hetta bendir so aftur á, at bankin verður seldur ov bíliga. Taparin verður so landskassin - og vinnarin, ja, tað verður tann, sum hevur flestar pengar at keypa partabrøv fyri og sum dugir best at selja tey, tá kursurin er hægstur.
