At Jacob Vestergaard og landsstýrið – og øll okkara politiska skipan spælir høgt spæl, vita vit væl. Vit vita eins væl, at illa hevur hepnast at vinna ljóð fyri føroysku sjónarmiðunum í teimum 15 fundunum, sum hava verið um makrelfiskiskapin.
Royndin at býta sildafiskiakapin miseydnaðist longu eftir fyrsta fundin, og tí er mangt, sum bendir á, at sildafiskiskapurin hjá føroyingum nú skal brúkast sum kúbein í royndunum at fáa ES at seta handilstiltøk í verk móti Føroyum.
Í kjakinum á Deadline hjá Danmarks Radio mánakvøldið millum Sjúrð Skaale, fólkatingsmann, og Esben Sverdrup-Jensen, sum er stjóri í danska felagnum hjá uppsjóvarvinnuni, Danmarks Pelagiske Producentorganisation, kom fram, at tað helst er úr Danmark at størsta trýstið kemur, heldur enn úr Skotlandi og Írlandi, sum vit kanska hava hildið.
Esben Sverdrup-Jensen vísti greitt aftur sjónarmiðnum um, at meira er av sild í føroyskum øki við at vísa til kanningarúrslit hjá ES.
Men hóast Danmark fiskar nógv tann størsta partin av sildakvotuni, so vildi Esben Sverdrup-Jensen kortini vera við, at tað eru føroyingar, sum ovurfiska.
Av samlaðu kvotuni vildi ES ikki geva føroyingum meira enn fimm prosent – sum Vestergaard setti til 17. Danmark og hini londini fiska altso 95 prosent og mugu tí eiga sín stóra lut í teirri ovurfisking, sum fer fram.
Men danska stjórnin er sum vera man í eini tvístøðu: Skal hon mæla ES til at seta revsitiltøk í verk ímóti føroyingum í ríkisfelagsskapinum, ella skal hon seta seg upp ímóti donsku uppsjóvarvinnuni, sum trýstir hart á stjórnina og Fólkatingið um at mæla til boykoytt ímóti føroyingum.
Og fyri at gera tað heila uppaftur meira fløkt, so eru fleiri føroyingar í nevndini í Danmarks Pelagiske Producentorganisation – eisini onkur, sum hevur stór fíggjarlig áhugamál í føroyskum vinnulívi.
So fáa hesir landsmenn okkara, skiparar í Norðurjyllandi, makt, sum teir hava akt – og Danmark mælir ES til at boykotta Føroyar, kann tað gerast eitt eljustríð millum ríkisborgarar og landsmenn.
