Soleiðis ljóðaði niðurstøðan hjá løgmanni sunnudagin – eftir at hann hevði lisið frágreiðingina, sum Jørgen Niclasen legði fram á tíðindafundi í Miðlahúsinum fríggjadagin.
Á tíðindafundinum segði Jørgen Niclasen eisini, athann hevði greitt løgmanni frá hesum máli, tá Kaj Leo Holm Johannesen, løgmaður, av fystan tíð setti Jørgen Niclasen sum landsstýrismann – tann 26. september í 2008.
Løgmaður er seinni spurdur, um hann visti um málið, og tað hevur hann váttað, hóast hann ikki neyvt mintist, hvat Jørgen Niclasen hevði greitt honum frá.
At talan er um eitt mál, sum hevur týdning, er eyðsæð. Jørgen Niclasen hevði ikki havt greitt løgmanni frá tí, um hann ikki helt málið hava týdning fyri sítt trúvirði. Men at eitt mál kann fylla so nógv, so langt aftaná, at Jørgen Niclasen hevur greitt tað fyri løgmanni sigur okkurt um, at kriteriini helst ikki eru heilt í lagi, tá landsstýrisfólk verða tilnevnd, og spurningurin er, hvussu álvarsliga løgmaður í slíkum førum fer við upplýsingum, og hvussu gjølla hann kannar teir.
Niðurstøðan av tíðindafundinum hósdagin var, at Jørgen Niclasen hevur selt vørur, sum ikki vóru tollaðar. Men umberingin hjá honum var, at hann gjørdi tað, tí hann visti ikki betur. Tann persónurin í hansara fyritøku, sum hevði móttikið brævið, er ikki á lívi longur, so tað kundi ikki greiðast nærri.
Eftir stendur eisini, at meðan N. Niclasen hevði goldið gamla tollskuld niður til 52.000 krónur, so hevur Skipafelagið Føroya rindað rokningina upp á eina hálva millión í tollkreditti til fyritøkuna N. Niclasen, sum felagið ikki átti at fingið.
So meðan Jørgen Niclasen kann skjóta seg undir, at hann visti ikki betur, so hava tollmyndugleikanir vitað, at teir vórðu »snýttir«, og tí gjørdi fútin ikki meira við málið.
Soleðis verður lok lagt á hetta málið – og løgmaður hevur fult álit á ovasta tollmyndugleikanum í Føroyum, Jørgen Niclasen.
