- Øll partrolarapørini eru til fiskiskap. Skipini fáa mest av upsa og so nakað av hvítum fiski, og fiskiskapurin er misjavnur.
Tað vita tey á Fiskamarknaði Føroya at siga í dag.
Tvey partrolarapør eru framvegis á gulllaksaveiði. Tað merkir, at gulllaksavertíðin í ár er ein av teimum drúgvu.
Um djúpvatnstrolararnar verður sagt soleiðis:
- Ein ísfiskatrolari fiskar blálongu, og ein annar er farin í bretskan sjógv at fiska svartkalva. Báðir ísfiskatrolararnir koma inn at landa í næstu viku.
Ein frystitrolari er í Eysturgrønlandi, og ein fiskar undir Føroyum. Báðir fiska svartkalva.
Í løtuni eru tveir av teimum smáu trolbátunum á landleiðini. Teir fáa mest av flatfiski og so nakað av toski.
- Tríggir trolbátar eru norðanfyri og fáa mest av hýsu og toski og so nakað av flatfiski. Allir koma inn at landa í næstu viku.
Lagt verður aftrat, at tvey garnaskip fiska svartkalva, og eitt fiskar havtasku.
- Fiskiskapurin eftir svartkalva er brúkiligur, men tað er smáligt við havtasku. Øll garnaskipini landa í næstu viku, siga tey á Fiskamarknaði Føroya.
