Atlantic Petroleum boðar frá, at framleiðslan á Orlando-oljuøkinum í bretska partinum av Norðsjónum er endaliga steðgað.
Boðini koma, eftir at bretska orkufelagið Serica Energy hevur upplýst, at framleiðslan steðgaði í mai, tá ein undirvatnspumpa fór fyri skeyti. Sambært felagnum er tað ikki búskaparliga forsvarligt at umvæla skipanina, tí Ninian-pallurin, sum Orlando er knýtt at, verður tikin úr rakstri í 2027.
Atlantic Petroleum seldi sín ognarlut í Orlando í 2017, men hevur framvegis fíggjarlig rættindi gjøgnum avtalu um royalty-gjald og útsettar gjaldingar, sum hava verið treytaðar av framleiðsluni á økinum.
Nú eingin framleiðsla verður aftur, metir Atlantic Petroleum, at nærum alt virðið av hesum rættindunum er farið. Tí væntar felagið at niðurskriva virðið av Orlando-ognum niður móti null í komandi roknskapi.
Felagið sigur, at oljuøkið er komið til endan á síni búskaparligu livitíð nógv fyrr enn roknað varð við, tá virðið av ognunum varð mett.
Atlantic Petroleum arbeiðir nú við at rokna út endaligu roknskaparligu avleiðingarnar, men væntar ikki, at nakar týðandi fíggjarligur ágóði fer at koma frá Orlando framyvir.
Myndatekstur:
Atlantic Petroleum væntar at niðurskriva nærum alt virðið av sínum fíggjarligu áhugamálum í Orlando-oljuøkinum, eftir at framleiðslan er endaliga steðgað.
