Aftur eitt ár og aftur eitt gullheiðursmerki til Pætur Marjunarson Dahl.
Tað er úrslitið, eftir at FM í tennis hevur verið farnu vikuna.
Pætur M. Dahl spældi móti Annfinn Gaard í finaluni, sum hann vann í tveimum settum við settúrslitunum 6-2 6-1.
Annfinn Gaard spældi seg í finaluna við at vinna á Jón Brekku, sum annars var í finaluni í fjør. Talan var um ein langan hálvfinaludyst, sum Annfinn Gaard vann við úrslitinum 7-6 6-7 6-3.
Í hinari hálvfinaluni spældi Pætur M. Dahl móti Hjalta Mohr, og tann dysturin endaði 6-4 6-1.
Jón Brekku og Hjalti Mohr skuldu sostatt eisini spæla um triðja plássið í FM, og tann dystin vann Jón Brekku 6-4 6-3.
Erling í Liða aftur serniormeistari
Hjá seniorunum varð tað eisini FM vinnarin frá í fjør, Erling í Liða, ið tók gullið aftur í ár.
Holger Arnbjerg hevði í ár spælt seg í finaluna, men Erling í Liða var ov sterkur og vann dystin 6-0 6-2.
Ingi Højsted vann B-finaluna
Eins og vanligt varð kappingin harrakappingin skipað í A og B kapping, har allir teir, ið vórðu spældir út úr A kappingini áðrenn semifinalurnar, endaði í B kapping.
Í finaluni í B kappingini spældu Ingi Højsted og Magnus í Króki. Ingi Højsted kom best frá byrjan og vann fyrsta sett við seks partíum móti einum, áðrenn Magnus í Króki svaraði aftur og vann annað settið 5-7. Tá gjørdi Ingi Højsted bart og vann triðja sett eins og fyrsta, soleiðis at samlaða úrslitið gjørdist 6-1 5-7 6-1.
Kvinnurnar verða avgreiddar í vikuni
Kappingin um føroyameistaraheitið hjá kvinnunum hevur eisini verið í gongd í farnu viku, og hálvfinalurnar verða avgreiddar í dag.
Í aðrari hálvfinaluni møtast Rúna Seyer Eliassen og Barbara Jacobsen, meðan Rúna Jakobsen skal spæla móti Føroyaleikavinnaranum frá í ár, Katrin á Neystabø.
Báðar hálvfinalurnar verða spældar kl. 16.00 í dag, og finalan verður síðani avgreidd í morgin.
##med2##
##med3##
