Talan erum málið millum Reiðarafelagið og Fiskivinnu- og samferðslumálaráðið. Reiðarafelagið vann í Føroya rætti, men landsstýrið vann í Landsrættinum – og í morgun aftur í Hægstarætti.

Reiðarafelagið fekk loyvi at fara í Hægstarætt við málinum.

Tað var í lagi, tá landsstýrið í 2016 avgjørdi, at manningarnar ikki skuldu gjalda sín part av kvotunum, tá talan var um royndaruppboðssølur í 2016, segði Landsrætturin.

Eystari Landsrættur broytti í september 2022 dómin hjá Føroya Rætti, sum í januar í 2021 segði, at Fiskimálaráðið gjørdi seg inn á sáttmálan millum manningarfeløgini og reiðararnar, tá landsstýrið við lóg gjørdi av, at manningarnar ikki skuldu eiga lut í kostnaðinum.

Endurgjaldskravið hjá Reiðarafelagnum var slakar 18 milliónir krónur, men tað er bara fyri 2016, og kravið fyri 2017 er ikki kunngjørt enn.

Reiðarafelagið vildi fyrst hava Hægstarætt at staðfesta, um landsstýrið hevði endurgjaldsskyldu. Reiðarafelagið vildi hava Hægstarætt at gera lógina um uppboðssølu ógilduga við at vísa til, at talan var um brot á evropeiska mannarættindasáttmálan um felagsfrælsi.