Týskvøldið hin 30. desember – ella næst seinasta dag í árinum – verður aftur skipað fyri rekkjukoyring í Sandoynni.
Hetta er eitt hugnaligt tiltak har tey, sum eru við, fáa eina festliga løtu saman, og áskoðarar sleppa at síggja nakrar vælpyntaðar bilar.
- Hetta er eitt kvøld fylt við lívi, góðum stemningi og flottum bilum, siga tey, sum skipa fyri rekkjukoyringini í Sandoynni.
Tey gleða seg at síggja nógvar og vælpyntaðar bilar, bæði stórar og smáar - úr Sandoynni og aðrastaðni.
- Vit gleða okkum at síggja tykkum øll, bæði tykkum, sum koma at koyra og øll, sum vilja sígga pyntaðu bilarnar koyra ígjøgnum bygdirnar.
Byrjað verður sum altíð á Skopunarkai, og haðani verður koyrt runt í bygdini í Skopun, áðrenn leiðin verður løgd til Sands.
Eisini á Sandi verðu koyrt í einari rutu gjøgnum bygdina, har steðgað verður niðri við havnarlagið á Sandi eina løtu.
- Síðan verður farið eystureftir – fyrst til Húsavíkar og síðan til Skálavíkar, og rekkjukoyringin endar aftur í Skopun.
Túrurin tekur smáar tveir tímar tilsamans, og í Skopun verður flottasti bilurin funnin, og vinnarin fær eina virðisløn.
##med2##
- Komið øll við og pyntið bilin – so fáa vit eitt hugnaligt og festligt kvøld saman, siga fyrireikararnir.
Tiltakið er bæði fyri fólk í Sandoynni og onnur, sum hava hug at koma suður at koyra rekkjukoyring týskvøldið hin 30. desember.
- Øll eru hjartaliga vælkomin at verða við, leggja tey aftrat.
Tað eru systkini, Andrea Tungá og Jógvan Finnur Thomsen, ið standa sum fyriskiparar av rekkjukoyringini í Sandoynni.
