Amerikanski uttanríkisráðharrin, Marco Rubio, boðar frá umskipan av amerikanska uttanríkisráðnum.
Tað stendur í tíðindaskrivi í dag.
Ráðharrin nevnir tað eina "umfatandi umskipanarætlan".
- Økisspesifikkar funktiónir verða raðfestar fyri at økja um virksemið, óneyðugar skrivstovur verða burturbeindar, og ikki-lógarbundnar útbúgvingar, sum ikki eru í samsvari við kjarnuáhugamálini hjá USA, verða ikki longur til, stendur í fráboðanini.
Í februar segði amerikanski forsetin, Donald Trump, at tað fóru at verða gjørdar broytingar í uttanríkistænastuni - tí partinum av statsfyrisitingini, sum umsitur viðurskiftini hjá statinum við aðrar statir.
Amerikansk embætisfólk søgdu í mars, at deildin fyrireikaði seg til at lata næstan eini tíggju konsulát aftur.
Fráboðanin í dag vísir tó ikki, um konsulátini verða stongd. Tað er heldur ikki greitt, um tað verða uppsagnir orsakað av ætlanini - og um so er, hvussu nógvar.
Uttanríkisráðharrin heldur, at ráðið gjøgnum árini er vorðið "uppblást, byrokratiskt og illa ført at røkja sína avgerandi diplomatisku uppgávu í hesi nýggju tíðini við stórari kapping millum vald".
Rubio er eisini tann, sum umsitur USAID, sum er stovnurin hjá USA fyri menningarhjálp og heimsins størsti einstaki gevari.
Her hevur Trump-stjórnin avgjørt at steðga meginpartinum av menningarætlanunum.
The New York Times hevði frammanundan fingið innlit í eitt uppskot til forsetakunngerð og skrivaði, at stórar broytingar vóru ávegis í ráðnum.
Við X noktaði Rubio søguni tá.
- Hetta eru følsk tíðindi. New York Times er enn einaferð vorðið offur fyri einum sviki.
Ritzau/Reuters
