Í kvøld skriva útlendskir miðlar, at næst størsti býurin í Ukraina, Kharkiv, er undir russiskum rakettálopum.
Tað sigur borgarstjórin í býnum, Ihor Terekhov, á boðtænastuni, Telegram, og tað er tíðindastovan, Reuters, sum endurgevur.
Sagt verður, at spreingingar hava verið í býnum í kvøld.
- Kharkiv er aftur undir russiskum álopum. Fyribils sær út til, at tað eru sentral øki, sum lopið verður á, sigur borgarstjórin.
Fráboðaninar hjá borgarstjóranum á Telegram í kvøld eru fyribils ikki váttaðar av óheftum keldum.
Men, samstundis sum russar leypa á Kharkiv, sigur guvernørurin í Belgorod-regiónini í Russland, at ukrainar leypa á syðra part av Belgorod.
- Russiskar loftverjustøðir hava forðað fyri trimum loftálopum í Belgorod. Streymveitingin hevur fingið nakað av skaða, men her er eingin fólkaskaði.
Tað sigur guvernørurin í russisku Belgorod-regiónini, Vyacheslav Gladkov, á boðtænastuni, Telegram.
Tíðindini um álopini á Belgorod í kvøld eru heldur ikki váttað at óheftum keldum.
##med2##
