Russar hava sent óteljandi dronur og rakettir eftir ukrainska høvuðsstaðnum, Kyiv og øðrum ukrainskum býum, hesi seinastu fýra árini, síðan Russland leyp á grannalandið.
Flestu álopini hava verið um næturnar, men í morgun varð lopið á í fullum dagsljósi, meðan fólk vóru á veg til arbeiðis og í skúla.
Loftávaring var í Kyiv klokkan 08.26 í morgun, lokala tíð, og bert 20 minuttir seinni kom álopið, veit Kyiv Independent at siga.
Harðar spreingingar vóru at hoyra á luftini, tá ukrainska loftverjan steðgaði einari røð av russiskum dronum og rakettum.
Tíðindafólk hjá AFP siga, at ljóshav og roykskýggj vóru at síggja á himmalhválvinum, samstundis sum borgarar í høvuðsstaðnum royndu at søkja sær skjól.
Stutt fyri klokkan 10, lokala tíð, var russiska álopið av.
Borgarstjórin í Kyiv, Vitalij Klitsjko, sigur, at vrakleivdir av dronum duttu niður yvir tvey økir í býnum, men einki er frætt um, at nakar hevur latið lív í álopinum.
Russar hava eisini lopið á næst størsta býin í Ukraina, Kharkiv, í landnyrðingspartinum av landinum, og sambært borgarstjóranum í býnum er ein persónur løstaður.
Álopið hevur serliga rakt undirstøðukervið í Kharkiv.
Men, ukrainar svara eisini aftur og borgarstjórin í Moskva, Sergej Sobjanin, sigur, at Ukraina seinastu dagarnar hevur skotið 250 dronur móti russiska høvuðsstaðnum.
Í einum boðum á Telegram skrivar borgarstjórin, at russiska loftverjan gjørdi eitt gott arbeiði við at skjóta ukrainsku dronurnar niður.
Hesi tíðindi eru tó ikki váttað av óheftum keldum.
