Síðsti mánaðurin hevur verið alt annað enn góður hjá B36. Tríggjar tær seinastu ferðirnar hevur árstalsfelagið tapt 2-1 í Gundadali. Soltna úrtøkan hevur borið við sær, at B36 er níggju stig frá fremsta plássinum.
Víkingur er topplið, og um víkingarnir sunnudagin megna at fara úr Gundadali við fullari úrtøku, so verður fjarstøðan frá B36 og fram til Víking tólv stig.
– Stigatalvan sigur, at talan er um lyklauppgerð. Í løtuni hava vit fokus á at fáa spælið at rigga, at spæla okkum til møguleikar og ikki minst at fáa mál burtur úr møguleikunum. Lagið er gott undir venjingunum, men sjálvandi kenna vit støðutalvuna, staðfestir Atli Danielsen, sum var burturstaddur, tá ið B36 tapti 2-1 ímóti HB, og tískil ikki var vitni til, at tríggir av liðfeløgunum vórðu vístir av vølli og harvið eru leikbannaðir undan lyklauppgerðini ímóti Víkingi.
Málverjin Meinhardt Joensen, liðformaðurin og miðvallarstríðsmaðurin Klæmint Matras og Símun Hansen eru leikbannaðir. Høgni Eysturoy er skaddur, og tað er Dánjal Rói Olsen eisini.
– Tað er saknur í teimum, men vit halda okkum framvegis hava eitt gott lið. Sjálvandi fer tað at síggjast á beinkinum, at so nógvir av teimum, sum hvørja ferð eru við, ikki eru tøkir hesa ferð.
B36 hevur spælt fimm ferðir í Gundadali higartil í ár. Einasta ferðin, at meistararnir eru farnir av heimavøllinum við fullari úrtøku var eftir fyrsta umfar, tá ið FC Suðuroy tapti 1-0.
Meðan B36 alla vikuna hevur savnað seg um fyrireikingarnar til sunnudagin, so var tað ikki fyrrenn eftir 1-0 steypasigurin á FC Suðuroy mikukvøldið, at Víkingur fór at hugsavna seg um avbjóðingina í Gundadali.
Mikukvøldið var Kaj Leo í Bartalsstovu eina løtu á vøllinum. At hann er um at koma fyri seg aftur kann verða stórur styrkur, tí Kaj Leo var fyrstu umførini ein av teimum mest eyðsýndu á toppliðnum.
Lasse Qvist og Hans Jørgen Djurhuus eru skaddir, og Bárður Hansen er burturstaddur.
B36 - Víkingur: Ransin N. Djurhuus
sunnudagin klokkan 15.00
