Í dag er tað gamla samgongan frá 2015-19 sum er á skránni hjá samráðingarleiðaranum Akseli V. Johannesen.
Tað var Framsókn, sum vildi royna Sambandsflokkin fyrst. Men tað var eisini Framsókn, sum vrakaði tann møguleikan – ella sum sagt verður, at tað var ósemja millum Framsókn og Sambandsflokkin um ríkisveitingina, meðan Javnaðarflokkurin lá ímillum og hevði ikki tann trupulleikan.
Tað hevur ljóðað, at tey í Framsókn vildu royna Sambandsflokkin fyrst – fyri ikki at verða skírd at vera ein reyður vinstrasinnaður flokkur. Men tann royndin er so fyribils steðgað.
Tí verður nú farið í holt við Tjóðveldisflokkin í staðin fyri Sambandsflokkin.
Tað verður ein samgonga við 18 tingfólkum. Tað er eitt fleiri enn í 2019, tí Javnaðarflokkurin nú hevur 9 tingfólk ímóti 8 tá, Framsókn hevur 3 í mun til 2 og Tjóðveldi hevur 6 í mun til 7.
Tað merkir, at javnvágin millum teir tríggjar flokkarnar er broytt. Og tað kann fara at síggjast aftur, tá og um landsstýrissessir skulu býtast millum flokkarnar.
