Tað er heilt spennandi kapping um FM heitið í kvinnufótbólti. EBS/Skála og KÍ hava leingi kappast borð um borð, og soleiðis er støðan eisini, nú 16. umfar hevur verið um vikuskiftið.
Í gjár varð tað nógv meiri spennandi, enn støðutalvan legði upp til, at tað fór at verða, tá ið EBS/Skála við Margáir hevði vitjan av 07 Vestur. Meðan EBS/Skála undan umfarinum hevði 33 stig, so hevði 07 Vestur níggju stig.
EBS/Skála vann 1-0, og tað ber boð um, at talan var um spennandi dyst. Einasta málið skoraði landsliðsspælarin Lea Lisberg við brotssparki miðskeiðis í fyrra hálvleiki.
Týskvøldið vann B36 grannauppgerð ímóti HB 3-1. Tíðliga seinnapartin í dag var aftur grannauppgerð í Gundadali, og nú endaði HB omaná. Úrslitið var 2-0. Astrid Mittfoss setti miðskeiðis í fyrra hálvleiki hol á, og seks minuttir undan dystarloki staðfesti Kára Djurhuus 2-0 HB sigurin.
Seint seinnapartin hittust Víkingur og KÍ í Sarpugerði. Týskvøldið vann KÍ 4-1, tá ið Víkingur var í Klaksvík. Í dag vann KÍ aftur, men talan var um stóran dramatikk og spenning, áðrenn dómarin bríkslaði fyri síðstu ferð, og KÍ fegnaðist um 3-2 sigur.
KÍ og EBS/Skála hava nú 36 stig í part, og KÍ málmunurin er +43, meðan hann hjá EBS/Skála er +22.
Eina løtu sá tað einki út hjá KÍ í Gøtu í dag. Tað var, tá ið støðan var 2-2, og dómarin bríkslaði fyri brotssparki til Víking og vísti Ragnu Patawary reyða kortið fyri at hava nýtt neyðbremsuna ímóti Hannu Isaksen Højgaard. Tá restaðu átta minuttir. Liðformaðurin hjá Víkingi Marita á Fríðriksmørk royndi seg úr 11 metrum, og hon sendi bóltin omanfyri málið aftanfyri Óluvu Allansdóttir Joensen í KÍ málinum.
Tríggjar minuttir seinni skoraði Maria Biskopstø tað, sum vísti seg at vera 3-2 sigursmálið hjá KÍ. Eftir innkast í høgru og innlegg eydnaðist tað Mariu at snara um seg sjálva og umvegis tvørtræið at senda bóltin í málið.
Hetta var annað málið hjá Mariu, sum var rættiliga eyðsýnd. Hon legði tíggju minuttir undan steðginum KÍ á odda 2-1 eftir langa framlegging frá Ragnu Patawary. Seks minuttir frammanundan hevði Eyðvør Klakstein javnað til 1-1 við fluktara eftir innlegg úr vinstru frá Tórun Højgaard Joensen.
Miðvallarin Jensa Tórolvsdóttir legði í 9. minutti Víking á odda 1-0 við fínum langskoti, og sjey minuttir undan steðginum javnaði Ruby Rose Dombek, tá ið hon var fyrst á returbóltinum, eftir at Jensa Tórolvsdóttir við fínum langskoti sendi bóltin í tvørtræið.
Toppliðini eiga ein innanhýsis dyst eftir. Hann verður leygardagin 25. september, tá ið EBS/Skála eigur heimavøll ímóti KÍ.
KÍ | 16 | 10 | 6 | 0 | 54 | 11 | 36 |
EBS/Skála | 16 | 11 | 3 | 2 | 35 | 13 | 36 |
NSÍ | 15 | 9 | 3 | 3 | 51 | 23 | 30 |
HB | 16 | 8 | 3 | 5 | 46 | 19 | 27 |
Víkingur | 16 | 7 | 2 | 7 | 43 | 27 | 23 |
B36 | 16 | 6 | 1 | 9 | 31 | 40 | 19 |
07 Vestur | 16 | 3 | 0 | 13 | 16 | 51 | 9 |
AB/B71 | 15 | 0 | 0 | 15 | 6 | 98 | 0 |
Leygardagin 11. september
KÍ – HB
NSÍ – Víkingur
07 Vestur – AB/B71
B36 – EBS/Skála