Russar hava aftur skotið rakettir eftir næst størsta býnum í Ukraina, sum eitur Kharkiv og sum liggur nær markinum til Russlands.
Í Kharkiv búgva umleið hálv onnur miljón fólk, og býurin hevur javnan verið fyri russiskum rakettálopum, síðan russar ásannaðu, at teir ikki megnaðu at taka býin.
Í fyrstani ljóðaði, at trý fólk høvdu latið lív eftir hetta seinasta rakettálopið á býin, men nú er talið av deyðum sambært guvernørinum í økinum komið upp á seks.
- Umframt hesi seks, sum lógu eftirá, er 16 fólk særd í álopinum, sigur guvernørurin, Oleh Synjehubov, sambært tíðindastovuni, Reuters.
Í dag raktu russisku rakettirnar ein íbúðarbygning í landnyrðingspartinum av býnum, og eldur kom í bygningin.
Forsetin í Ukraina, Volodymyr Zelenskyj, rópar álopið eitt útspekulerað og kyniskt álop á sivilfólk - eitt álop, sum Ukraina ikki fer at fyrigeva.
Russiskir myndugleikar hava fyribils ikki gjørt viðmerkingar til álopið, og hetta seinasta álopið á Kharkiv er ikki váttað av óheftum keldum.