SÍ vann á føroyameistaranum Mjølni í Bónuskappingini   

^{Tíðindaskriv:}

Bónuskappingin, bólkaspælið, menn:

SÍ – Mjølnir 3-1 (20-25, 27-25, 25-20, 26-24)

SÍ og Mjølnir hava longu tryggja sær pláss í hálvfinalunum í Bónuskappingini. Men spælt varð kortini, sum um alt stóð upp á spæl, og aftur hesa ferð fingu vit ein minniligan dyst við háspenningi millum vestur og norður. Fyri SÍ hevði dysturin helst serligan týdning, tí liðið skuldi fóta sær, eftir at Mateusz Paznan hevði fingið leikbann í 5 dystir og tí ikki verður við restina av kappingini.

Mjølnir legði best fyri og hevði fyri tað mesta tamarhald á fyrsta setti, tó at SÍ kom afturíaftur tvær ferðir og javnaði til 11-11 og 14-14, men eftir hetta dró Mjølnir frá og vann 25-20.

Í øðrum setti hevði Mjølnir tríggjar settbóltar ímóti sær, men yvirlivdi teir allar og fór framum 25-24. Tann settbóltin yvirlivdi so SÍ, sum eisini vann næstu tvey stigini og settið 27-25.

SÍ hevði greiða yvirvág í triðja setti og fór framum 20-12, men Mjølnir fekk samband aftur, tá ið munurin minkaði til 20-22. Nærri kom Mjølnir tó ikki, tí SÍ vann næstu trý stigini og settið 25-20.

Hóast SÍ var á odda 18-9 í fjórða setti, mundi tað farið fyri mutur og skutur, tí Mjølnir javnaði til 24-24, eftir at hava yvirlivað tríggjar dystarbóltar. Tað rakk tó ikki hjá Mjølni, tí SÍ vann næstu tvey stigini og settið 26-24 og dystin 3-1.

Harvið er greitt, at SÍ endar ovast í bólkinum og skal spæla ímóti nr. fýra, sum verður Fleyr. 

ÍF – Ternan 3-1 (25-22, 23-25, 25-16, 25-15)

Í Fuglafirði tryggjaði ÍF sær annaðplássið í bólkinum við sigri á Ternuni, sum tó megnaði at vinna annað sett og var eisini væl við í fyrsta setti, har javnleikur var 20-20, áðrenn ÍF vann 25-23.

Sum tvey’ari møtir ÍF Mjølni, sum gjørdist nr. trý. Annað og triðja plássið snúgva seg mest um kosmetikk, tí var støðan øvut, so vóru tað framvegis ÍF og Mjølnir, sum møttust í hálvfinaluni.

Hálvfinalurnar verða spældar á Giljanesi leygardagin 19. apríl, har SÍ sum bólkavinnari møtir Fleyr. Hin hálvfinalan verður, sum nevnt, millum ÍF og Mjølnir.

Finalan verður spæld í ítróttarhøllini Inni í Dal í Sandoynni leygardagin 26. apríl.

Støðan í bólkaspælinum: