Tvey føroyingalið í bestu donsku hondbóltsdeildini hjá kvinnum vóru í leiki í kvøld.
Liðið hjá Anniku Fríðheim Petersen, Nykøbing Falster tók á heimavølli móti komandi felagnum hjá Janu Mittún, Viborg.
Tað eydnaðist Nykøbing Falster at knógva ein 27-24 sigur heim. Í steðginum var Nykøbing Falster á odda 15-11.
Annika var sum so mangan fyrr annar málverji hjá Nykøbing Falster, ið hevur royndu og stinnu Cecilie Greve sum fyrsta málverja.
Pernille Brandenborg og liðfelagarnir í Keypmannahavn leiktu í kvøld á útivølli móti Aarhus.
Dysturin endaði við javnleiki 25-25. Í steðginum var Keypmannahavn á odda 12-10. Tá fýra minuttir vóru eftir at leika var Keypmannahavn á odda 24-22, men so skoraði Aarhus tríggjar ferðir á rað uttan, at Keypmannahavn svaraði aftur. Men Keypmannahavn fekk seinasta orðið og megnaði at javna til 25-25 áðrenn hallarlúðurin ýldi.
Pernille skoraði tvey mál fyri Keypmannahavn í kvøld.
Í seinasta dystinum í grundspælinum um eina viku hittast Keypmannahavn og Nykøbing Falster í Keypmannahavn. Eftir tað er endaspælið á skránni.
Nr. | Lið: | Dystir | Stig |
1 | Odense | 23 | 43 |
2 | Team Esbjerg | 23 | 39 |
3 | Ikast | 23 | 34 |
4 | Keypmannahavn | 23 | 29 |
5 | Nykøbing Falster | 23 | 28 |
6 | Viborg HK | 23 | 28 |
7 | Silkeborg-Voel | 23 | 21 |
8 | Aarhus United | 23 | 19 |
9 | Horsens | 23 | 18 |
10 | Ringkøbing | 22 | 13 |
11 | SønderjyskE | 23 | 10 |
12 | Skanderborg | 23 | 9 |
13 | Ajax | 23 | 7 |