Eftir lógini skulu øll skeinkistøð verða stongd klokkan fýra um náttina um vikuskiftið, og tað eru tey allarflestu.
Men klokkan 4.06 í nátt varnaðist løgreglan, at eitt skeinkistað í Havnini enn var opið og har var fult av fólki inni. Løgreglan gav sostatt boð um at lata aftur í stundini og at fáa fólk á dyr.
Tann, sum eigur skeinkistaðið kann so fegnast um, at lógin varð broytt fyri nøkrum árum síðani, tí annars hevði hann mist skeinkiloyvið. Upprunaliga stóð nevniliga í lógini, at tann, sum breyt hana, skuldi missa skeinkiloyvi, men seinni varð tað so broytt til at viðkomandi kundi missa tað.
Løgreglan sigur, at í hesum føri fær eigarin eina bót, og so fær eisini nevndin, sum letur skeinkiloyvini, eina frágreiðing um hendingina.
