Tað verður 30 ára gamla Slavisa Tomic úr Bosnia, ið skal taka sær av venjingunum hjá flogbóltsfelagnum Fleyr komandi árið. Í tíðindaskrivi boðar felagið frá, at tey hava gjørt eitt ára sáttmála við venjaran.
- Slavisa Tomic hevur spælt flogbólt í bestu deildini í Bosnia og í Serbia í fleiri ár og hevur harumframt verið venjari hjá ungdómsliðum í heimbýnum, Zvornic, tvídeildi býurin, ið liggur báðumegin markið millum Bosnia og Serbia. Slavisa er útbúgvin ítróttarlærari og hevur m.a. arbeitt á flogbóltsskúla, skrivar Fleyr í tíðindaskrivi.
Upplýst verður, at nýggi venjarin fer at verða leikandi venjari hjá besta mansliðnum hjá Fleyr og kemur harumframt at venja flestøll dreingjaliðini hjá felagnum.
Við at seta ein útlendskan venjara í starv vónar felagið, at tað kann vera við til at økja um áhugan fyri flogbólti millum havnarfólk.
- Fleyr vónar, at útlendski venjarin kann viðvirka til, at fleiri dreingir og menn í høvuðsstaðnum fáa hug at spæla flogbólt, og at besta mansliðið og dreingjaliðini fáa neyðugan styrk, skrivar Fleyr.
Fleyr hevur frammanundan gjørt sáttmála við Kristian Mikkelsen at venja bestu kvinnuliðini í felagnum. Fleyr fer um mánaðarskiftið á venjingarlegu á Eiði, og verður hetta umframt venjing eitt samansjóðingartiltak, har allir limir felagsins luttaka. Fyrsta flogbóltskappingin fyri vaksin er um 4 vikur, tá FK-kapping fyri eldri lið verður í Havn.
