Ein genta er ein av fýra, sum eru deyð í einum russiskum álopi á býin Kharkiv í norðeystur Ukraina fríggjadagin.
Álopið rakti eitt spælipláss og ein íbúðarblokk.
Tað segði borgarstjórin í Kharkiv, Ihor Terekhov, sambært AFP og Reuters.
- Hersetingarmenninir drupu eitt barn á spæliplássinum. Ein genta, skrivar hann á boðtænastuni Telegram.
Umframt tey fýra deyðu, hava í minsta lagi trý onnur fólk fingið skaða.
Eldur kom í bygningin í 12 hæddum, sum varð raktur í álopinum, leggur Terekhov afturat.
Guvernørurin í Kharkiv-økinum, Oleh Synegubov, sigur, at í minsta lagi 28 fólk eru særd av álopunum. Hetta skrivar AFP.
Á sosialu miðlunum hava fleiri brúkarar deilt myndir og videobrot, sum eftir øllum at døma vísa álopið í Kharkiv.
Her sæst gráur roykur rísa upp úr einum íbúðarblokki, har ovaru hæddirnar eru í ljósum loga.
Stutt eftir álopið endurtók ukrainski forsetin, Volodymyr Zelenskyy, áheitanina á sínar vesturlendsku sameindu um at loyva ukrainskum herdeildum at brúka langtrøkkandi vápn til at raka hernaðarstøðir í Russlandi.
- Hetta álopið hevði ikki hent, um verjudeildir okkara høvdu møguleikan at oyðileggja russisk hernaðarflogfør á støðum teirra, skrivar hann á Telegram.
Kharkiv er næststørsti býur í Ukraina. Hann er umleið 40 kilometrar frá markinum til Russland og hevur javnan verið bumbaður av russum síðani innrásina í februar 2022.
/ritzau/
