Blaðið tygum sita við í dag er 250. blaðið, sum Sosialurin gevur út í ár ? og harvið skriva vit føroyska blaðsøgu, tí higartil hevur einki føroyst blað megnað at komið so ofta á gøtuna.
Tað var tann 13. mars 1990, at sosialurin fór undir fimmdaga útgávuna. Fyri ta tíð kom blaðið út tríggjar ferðir um vikuna.
Tað var í sjeytiárunum, at Sosialurin rættuliga fór at menna seg sum tíðindablað, og við nýggju blaðhúsunum á Argjum í 1982 bar til at geva blaðið út tríggjar ferðir um vikuna, týsdag, hósdag og leygardag.
Í 1989 var blaðframleiðslan so smátt løgd yvir á teldur. Blaðfólkini settu nú sín egna tekst, og lætti hetta væl um hjá teknisku deildini.
Tá kreppan fór at raka bløðini fyrst í nítiárunum, gjørdust lýsingarnar færri og harvið eisini úrtøkan minni. Tí mátti finnast upp á onnur ráð.
? Neyð lærir nakna konu at spinna, sigur Jan Müller, sum eisini tá var ábyrgdarblaðstjóri á Sosialinum.
? Eitt tíðindablað fær ikki røkt sínar skyldur, um tað ikki er á gøtuni hvønn dag, og tí gjørdu vit av at loypa út í avbjóðingina, sum tað var at gera blaðið út fimm ferðir um vikuna, sigur hann.
Men síðani Sosialurin gjørdi fyrstu íløguna í teldurnar, er nógv broytt á teknsika økinum.
Tær teldurnar, sum tá vóru keyptar, eru veruligir fornlutir í dag, og teldur, sum klára fleiri hundrað ferðir so stórar uppgávur, eru fingnar til vega - umenn prísurin á teimum í dag er munandi lægri, enn prísurin á fyrstu teldunum.
Í 1997 - tá føroyingar vórðu knýttir upp í interneti, gjørdi Sosialurin eisini av at royna seg á tí økinum. Síðani 4. september 1997 hava fólk kring allan heimin havt møguleika at lisið tað, sum stendur í Sosialinum á internetinum.
Í dátabásini hjá Sosialinum á internetinum finnast um 18.000 greinar. Tann, ið hevur atgongd til Internet-Sosialin, kann leita frítt í øllum hesum tekstinum.
Árligu útgávurnar av Sosialinum síðani 1990:
1990210
1991239
1992247
1993248
1994249
1995249
1996248
1997246
1998246
1999250
