Seinnu árini hevur stórsteypadysturin verið fyrsta veruliga teknið um, at fótbólturin aftur er farin á rull, og so er eisini hesa ferð. Sunnudagin klokkan 16 møtast HB og EB/Streymur í dystinum, ið verður spældur til frama fyri okkurt vælgerandi átak hjá Lions Club í Føroyum.
Fyri viku síðani spældu føroyameistararnir og steypavinnararnir frá í fjør finaluna í Klaksvíkskappingini, og tá royndist EB/Streymur eitt mál betur enn HB. So fæst at síggja, um HB vinnur Lions-steypið triðja árið á rað ella um EB/Streymur skal vinna tað fyrstu ferð.
Pætur Albinus dømir dystin og hevur aftur at sær Jón Kára í Brekkuni og Pætur E. Rasmussen sum linjudómarar. Eftir dystin handa Niels Nattestad frá Lions Club og Christian Andreasen frá Fótbóltssambandinum liðunum heiðursmerki og vinnaranum steyp, og eisini fær CDT-felagið handað gávubræv upp á ágóðan av dystinum
Atgongumerkini til henda dystin hava vanligan Vodafoneprís, men ikki hevur verið óvanligt hini árini, at fólk fegin rinda meira enn ásetta prísin, og tí hevur borið til at savna fitta upphædd til vælgerandi endamálið.
