Tað mangla 25 metrar av svimjingini á Isle of Wight og Pál Joensen vendur fyri seinastu ferð í 4x100 metrar frí. Á geilini við síðuna av er Guernsey og tað er púra javnt millum teir báðar. Guernsey hevur samanlagt 15 gullheiðursmerkju, meðan vit hava 14. Skulu vit leggja okkum undir liðina á Guernsey samanlagt, so má Pál í eyka tangan at finna seinastu orkuna at leggja seg á odda. Nøkur sekund seinni er greitt, at Pál Joensen er í einum flokki fyri seg sjálvan. Fyri hvørt tak hann tekur, økist munurin millum hann og Jeremy Osborne úr Guernsey. Tá Pál kemur á mál vísur klokkan í Medina svimjuhøllini; 3:24.10. Nýtt oyggjaleikamet, gull í 4x100 metrar frí hjá monnum, og ein frálíkur endi upp á svimjingina.
Upp og niður
Tað hevur gingið upp og niður hjá føroysku svimjarunum á oyggjaleikunum. Mánadagin gekk illa, men týsdagin gjørdu vit eitt gott hál. Mikudagin gekk aftur verri og vandi var fyri einum veruligum vónbroti á Isle of Wight. Undan finalu umfarinum í gjár tordu fá at vænta tað stóra av okkara svimjarum. Tað skuldi tó vísa seg at verða eitt minniligt kvøld í Newport á Isle of Wight. Vónirnar um at fanga Guernsey aftur samanlagt vóru at kalla ongar, men longu í nærstu finaluni svam Pál seg til eitt gullheiðursmerki í 400 frí. John Gallichan úr Jersey trýsti Pál til tað seinasta, men seinastu 50 metrarnar setti Pál ferð á og vann.
Magnus Jákupsson vs Ian Powell
Í fimm kappingum eru 25-ára gamli Ian Powell úr Guernsey og 16-ára gamli Magnus Jákupsson tilmeldaðir við tveimum teimum bestu tíðinum. Í 100 metrar rygg svam Magnus skjótari enn oyggjaleikametið frá 2009, men tað gjørdi Ian Powell eisini. Hann kom á mál 0.41 sekund áðrenn Magnus og vann sostatt gullið frammanfyri Magnusi. Í 50 metrar frí hjá monnum vann Pauli Øssurson Mohr gull og Heðin L. Olsen bronsu. Minni enn eitt sekund skilti nummar eitt frá nummar seks.
Birita og Poula fremst
Í 50 metrar rygg hjá kvinnum vunnu vit bæði gull og silvur. Hesa løtuna var gott lag á føroysku viðhaldsfólkunum. Birita Debes var undan finaluni mett sum favorittur, meðan meiri óvist var hvussu Poula Øssursdóttir Mohr fór at klára seg. Tað var longu greitt tá tær vendu á 25 metrum, at Birita Debes lá væl til at vinna gull. Tí mundi størsta gleðin verða tá tað gjørdist greitt, at Poula kom var næst á mál.
Bringu Pál
Eina løtu riggaði alt hjá føroyingunum í Medina svimjuhøllini. Eisini í 200 metrar bringu hjá monnum komu vit fyrst á mál. Í harðari kapping við Thomas Hollingsworth av Guernsey, kom Pál Joensen fyrstur á mál. Enn eina ferð settu vit eisini nýtt oyggjaleika met við tíðini 2:15.96.
Oyggjaleikamet ikki nokk
At kappingin er hørð á hesum leikunum prógvði 4x100 metrar hjá kvinnum. Tær fýra, Birita Debes, Turið S. Christiansen, Poula Ø. Mohr og Cecilia W. Eysturdal, svumu stafettina skjótari enn oyggjaleikametið í 2009, men tað var bara nokk til eitt silvur heiðursmerki, tí genturnar úr Jersey vóru upp aftur skjótari. Hetta var afturgangandi fyri svimjingina á Isle of Wight. Hóast tíðirnar hjá føroyingum vóru góðar, so blivu tær ikki altíð umsettar til gullheiðursmerki.
Moralski sigurin
Á oyggjaleikunum er vanligt, at enda seinasta dagin við eini mix stafett, har svomið verður 8x50 metrar frí. Tað eru skiftivís dreingir og gentir, ið svimja. Kappingin telur ikki í samlaðu støðuni, men hóast tað, so verður gingið høgt upp í hana. Her prógvaðu okkara svimjarar, at vit eru besta oyggjasamfelagið í svimjing. Við tíðini 3:28.52, vóru føroysku svimjararnir fýra sekund fyrr á mál enn Guernsey. Við nýggjum oyggjaleikameti, vunnu føroysku svimjararnir moralska sigurin.
Samanlagt
Við 15 gull og 12 silvur heiðursmerkjum í part, gjørdist talið á bronsuheiðursmerkjum avgerandi fyri hvør vann svimjingina samanlagt. Har høvdu vit seks móti teimum ellivu hjá Guernsey, sum sostatt vann samanlagt. Føroyar settu sær sum mál at vinna 30 gullheiðursmerki, men náddi bara helminginum. Ein stórur partur av søguni er, at støðið á svimjingini er hækkað ótrúliga nógv síðani 2009. Tað blivu sett heili 38 nýggj oyggjaleikamet, nakað sum ongin hevði væntað undan leikunum. Tá skal eisini havast í huga, at tær sokallaðu “superdraktirnar” blivu bannaðar eftir oyggjaleikirnar í 2009. Føroysk svimjing hevur tikið seg fram síðani seinastu leikirnar, men tað hava onnur lond eisini. Hinvegin tykjast vit hava aldurin á okkara síðu, tí flestu av okkara svimjarum vóru undir 20 ár.
