Bókin “Stanley” hevur fingið góða móttøku og rósandi orð, nú alsamt fleiri fólk hava lisið hana. “Rørir ein í hjartadýpið”, “Góð, lætt lesilig bók” og “So góð! Havi lisið hana. Løtt at lesa, lívsjáttandi, álvarsom og erlig” eru nøkur av ummælunum, ið eru at finna úti á sosialu miðlunum.
Lívssøgan hjá Stanley er um fuglfirðingin, ið bara hálvt ára gamal misti pápan, bara 12 ára gamal stóð á palli sum gittarspælari við Silly Boys fyri fyrstu ferð og sum bara 19 ára gamal fór til Danmarkar at vitja ein bróðurson í tvær vikur – og varð verandi niðri!
Fortalt verður um barna- og ungdómsárini í Fuglafirði, um tónleikalív niðri, har hann hevur livað av sínum tónlistarligu evnum og spælt saman við nógvum av frægastu donsku tónleikarunum. Hetta er stutt sagt lívssøga hansara í bæði góðum og minni góðum døgum.
Ikki minst verður fortalt um sterka heimlongsulin, ið hevur verið drívmegin aftan fyri tann partin av hansara tónlistarligu leið, ið føroyingar bæði hava lært at kenna og elska alla hesa øldina, millum annað við framúr tulkingum av yrkingum hjá Janusi Djurhuus og øðrum.
Seinnu árini hevur Stanley Samuelsen fingið eina avbjóðing aftrat í lívi sínum, sum er Alzheimers sjúka, og bókin stuðlar eisini Alzheimerfelagnum, tí 20 krónur verða latnar felagnum av hvørjari seldari bók. Til tiltakið í Føroyahúsinum leygarkvøldið fæst bókin fyri serprís, og eisini ber til at fáa hana signeraða.
