Íslendska stjórnin leggur frá sær og fyrireikar seg til nýval.
Stjórnarsamgongan í Íslandi er slitnað. Alt bendir á nýval í november.
Tað er Bjarni Benediktsson, forsætisráðharri, sum á tíðindafundi í dag boðaði frá, at hansara stjórnarsamgonga er slitnað.
Væntandi verður nýval útskrivað mánadagin, sum verður í november.
Orsøkin til, at stjórnin fer frá, skal vera ósemja um tilflytara, orkupolitikk og fleiri onnur øki eisini, boðar ríkisútvarpið og sjónvarpið, Rüv, frá.
Stjórnin í Íslandi er ein samgongustjórn, sum er samansett av konservativa Sjálvstýrisflokkinum, liberala Framsóknarflokkinum og Grøna Vinstrarørslan.
Bjarni Benediktsson, sum áður hevur verið fíggjarmálaráðharri og uttanríkisráðharri, er leiðari í Sjálvstýrisflokkinum.
Mánadagin fer hann á fund við Hallu Tómasdóttur, sum er forseti Íslands.
Her boðar hann formliga frá, at stjórnin leggur frá sær.
Sambært svensku tíðindastovuni TT og norsku tíðindastovuni NTB verður helst útskrivað nýval, sum verður 30. november.
Næsta regluliga valið skuldi annars ikki vera fyrr enn næsta heyst.
Teir tríggir stjórnarflokkarnir hava skipað stjórnarsamgongu síðani 2017, men Bjarni Benediktsson hevur bert verið forsætisráðharri síðani apríl.
Á tíðindafundinum sunnudagin segði hann, sambært íslendska miðlinum Iceland Review, at stjórnarsamgongan hevur avrikað mangt og hvat í ringum tíðum.
Hann vísti millum annað á handfaringina av koronafarsóttini og gosfjøllum.
Sambært útsøgnum hansara hevur hann gjørt alt, hann kundi, fyri at fáa partarnar at semjast um tey øki, sum ósemja er um.
Men allir møguleikar hava nú verið royndir og tað hevur verið til fánýtis.
Hann sigur, at stjórnin heldur fram til nývalið, og hann væntar, at tey fara at finna útav, hvussu stjórnast skal.
Um tað ikki ber til, fer hann at leggja frá sær sum forsætisráðharri, og so skal ein fyribils stjórn taka við
Meiningarkanningarnar hava seinastu tíðina givið góðan andstøðuflokkinum Javnaðarflokkinum vind í seglini.
/Ritzau/
;
