Hetta veit norski veðurlagsstovnurin at siga í dag, og tað er tíðindastovan NTB, sum ber hesi tíðindi.
Eitt lágtrýst millum Spitsbergen og Norðurpólin gevur í løtuni lýggjan vind vestaneftir yvir Svalbard.
- Tí er oyggjabólkurin einasta stað í kongaríkinum, sum í løtuni hevur hita omanfyri null stig, veit veðurlagsstovnurin at siga.
Lagt verður aftrat, at eitt hátrýst við Bjarnoynna forðar køldu luftini, soleiðis at hon verður liggjandi á leiðini longur suðuri.
Tað er annars sera kalt summastaðni í Noregi í løtuni, og kaldasta staðið er Karasjok við heili 37 kuldastigum.
Seinastu dagarnar hava vit eisini hoyrt um nógvan kulda har norðuri í Svøríki.
