Fólkatingslimirnir í Norðuratlantsbólkinum, Juliane Henningsen, Høgni Hoydal og Lars-Emil Johansen, skipa aftur í ár fyri einum studentadegi fyri føroysk og grønlendsk lesandi í Danmark
Studentadagurin verður tann 27. mars 2009 í Landstingssalinum á Christiansborg. Evnið á stevnuni er flytføri í arbeiðarafjøldini millum Danmark, Grønland og Føroyar. Fleiri hundrað føroyingar og grønlendingar flyta hvørt ár til Danmarkar at lesa. Nógv fara heim aftur eftir loknan lestur, men fleiri verða verandi í Danmark ella flyta til annað land. Á studentadegnum verður fokus á, hvussu tilfeingið kann verða brúkt á besta hátt, bæði frá danskari, føroyskari og grønlendskari síðu.
Nógvir føroyingar og grønlendingar búgva í Danmark
Norðuratlantsbólkurin á Fólkatingi hevur seinastu árini gjørt kanningar um ávikavist føroyingar og grønlendingar búsitandi í Danmark. Kanningarnar vísa, at umleið 23.000 føroyingar og 18.500 grønlendingar, býttir í trý ættarlið, búgva í Danmark. Millum hesi eru nógv vælútbúgvin, og kvinnur eru í meiriluta. Umframt tey lesandi, er sostatt eisini ein annar stórur bólkur, ið kundi verið ein styrkur fyri Grønland og Føroyar.
Studentadagurin førur norðuratlantslondini tættari
Seinastu árini hava umleið 150 føroysk og grønlendsk lesandi luttikið á studentadegnum, og ráðstevnan hevur tikið fleiri áhugaverd evni upp. Harafturat hava allir teir stóru flokkarnir í Fólkatinginum verið umboðaðir. Í ár eru føroyskir og grønlendskir røðarar eisini bjóðaðir við. Ráðstevnan verður í tveimum pørtum; fyrst eitt pallborðskjak, har tríggir danskir fólkatingslimir og 4 grønlendskir og føroyskir politikarar og vinnulívsfólk tala. Annar partur verður eitt bólkakjak, har tey lesandi kunnu fáa tættari orðaskifti við fyrilestrarhaldararnar. Aftaná tiltakið í Landstingssalinum skipa føroyska og grønlendska studentafelagið, MFS og Avalak, fyri einum døgurða og veitslu fyri teimum lesandi.
Skrá
Kl. 12:00 - 13:00 KOMA OG SKRÀSETING
Kl. 13:05 - 13:15 Juliane Henningsen, Norðuratlantsbólkurin
Kl. 13:15 - 13:25 Line Barfod, Enhedslisten
Kl. 13:25 - 13:35 Julie Rademacher, Socialdemokraterne
Kl. 13:35 - 14:05 Spurningar/Kjak
Kl. 14:05 - 14:25 Stuttur steðgur ? bólkurin bjóðar kaffi og te
Kl. 14:25 - 14:35 Lars-Emil Johansen, Norðuratlantsbólkurin
Kl. 14.35 - 14:45 Christian Nagata, Stjóri í Nema
Kl. 14.45 - 14:55 Svend Hardenberg, Stjóri í Nukissiorfiit
Kl. 14:55 - 15:05 Heðin Mortensen, Borgarstjóri í Tórshavnar Kommunu
Kl. 15:05 - 15:15 Asii Chemnitz Narup, Borgarstjóri í Sermersooq Kommunu
Kl. 15:15 ? 15:45 Spurningar/Kjak
Kl. 15.45 ? 16.50 Bólkakjak / ?Workshop?
Kl. 16.50 ? 17.00 Høgni Hoydal, Norðuratlantsbólkurin
Kl. 17.00 RÁÐSTEVNAN ENDAR
