Hetta gjørdist ein góður dagur hjá føroyingaliðunum í næstbestu norsku hondbóltsdeildini.
Teis Horn Rasmussen og liðfelagarnir í Follo vunnu stórsigur 37-21 á Nordstrand á heimavølli. Longu í steðginum var alt mest sum avgjørt. Follo var á odda 19-8 í steðginum.
Teis gjørdist toppskjútti hjá Follo við sjey málum. Haraftrat vann hann liði sínum tvey brotskøst.
Teis er næstbesti málskjúttin hjá Follo. Higartil hevur Teis skotið 79 mál í kappingini. Besti málskjúttin hjá Follo er Mads Vejby Hansen við 90 málum.
Julian J. Kragesteen, Tróndur Mikkelsen og liðfelagarnir í Ryger Stavanger vunnu eisini stórsigur á heimavølli í dag.
Ryger vann 36-22 á Herulf Moss. Í steðginum var Ryger á odda 15-10.
Julian skoraði fýra mál og legði upp til trý mál fyri Ryger í dag. Tróndur skoraði eitt mál og legði upp til tvey mál.
Follo er nummar fýra í deildini við 27 stigum. Teimum á baki er Ryger á fimta plássinum við 26 stigum.
