EB/Streymur skrivar soleiðis:
Tað er við stórari gleði, at EB/Streymur í dag kann kunngera, at sáttmáli er gjørdur við unga og evnaríka Thomas Bjørn Miezan.
Longu sum 16-ára gamal fekk Thomas Bjørn debut í Betri-deildinifyri barndómsfelagið HB í dysti móti KÍ í mai mánaði 2022. Tveir mánaðar seinni skifti hann til akademiið hjá FCK, hvar ið hann var við til at vinna eina stóra altjóða kapping fyri U-17 aldursbólkin.
Thomas Bjørn valdi í 2024 at venda heimaftur til føroyskan fótbólt. Thomas Bjørn skifti til B68, sum hann umboðaði í fyrruhálvu av 2024. Í seinnu hálvu av 2024 leikti Thomas Bjørn við B36. Nú hevur hann so valt at skifta til EB/Streym og sáttmáli er undirskrivaður fyri 2025 og 2026.
19-ára gamli Thomas Bjørn hevur leikt 6 dystir í Betri-Deildini og leikt 15 dystir og skorað tvey mál í 1.deild. Thomas Bjørn hevur eisini umboðað U-15, U-17 og U-19 landsliðini hjá Føroyum, hvar ið hann tilsamans hevur leikt 18 dystir og skorað tvey mál.
Thomas Bjørn sigur í viðmerking til heimasíðuna: ”Eg vóni, at vit í EB/Streymi koma at fáa fleiri minnisríkar løtur og at eg kann hjálpa felagnum við at skjóta nøkur mál.”
Høvuðsvenjarin hjá EB/Streymi, Sigfríður Clementsen, er spentur uppá tilgongdina og sigur í viðmerking til heimasíðuna: ”Thomas Bjørn eitt av teimum stóru álops-talentunum í føroyskum fótbólti. Hann er ein ferð- og kraftmikil leikari við einari málnøs, sum vit vænta okkum nógv av.”
Thomas Bjørn hevur longu víst, at hann hevur málnøsina, ið høvuðsvenjarin umtalar. Hann debuteraði fyri felagið í vikuskiftinum, har hann spældi allan dystin og skoraði sigursmálið fyri 1.deildarliðið hjá okkum í 2-1 sigri móti 1.deildarliðnum hjá NSÍ.
Vit ynskja Thomas Bjørn vælkomnan til EB/Streym.
(Hagtølini eru frá Faroesoccer.com)
