Týskarin Thomas Tuchel er settur í starv sum nýggjur landsliðsvenjari hjá enska manslandsliðnum í fótbólti.
Tað skrivar enska fótbóltssambandið FA á X í morgun.
Tuchel fær enska Anthony Barry sum hjálparfólk, og teir yvirtaka leiðsluna av liðnum frá ársskiftinum.
Avloysarin Lee Carsley, sum hevur tikið við eftir Gareth Southgate í heyst, stendur sostatt eisini fyri liðnum í dystunum móti Grikkalandi og Írlandi í november.
Sambært FA skrivaði 51 ára gamli Tuchel longu undir sáttmálan týsdagin í síðstu viku.
Hann verður triði útlendingurin, sum hevur leiðsluna av Onglandi. Fyrr hava svenski Sven-Göran Eriksson og italski Fabio Capello verið enskir landsliðsvenjarar.
Tuchel hevur verið arbeiðsleysur, síðani hann fór úr týska Bayern München síðst í seinasta kappingarári. Hann megnaði eitt sindur meira enn eitt ár at venja í týska stórfelagnum, áðrenn hann segði upp eitt ár áðrenn sáttmálin fór úr gildi.
Hann hevur áður verið høvuðsvenjari hjá Mainz, Dortmund, Paris Saint Germain og Chelsea.
Stóra gjøgnumbrotið kom við Dortmund og steypakappingini í 2017. Síðani tá vann hann tvey meistaraheiti og kom í Champions League finaluna í 2020 við PSG.
Við Chelsea vann hann Champions League í 2021 og seinni sama ár HM hjá felagnum, áðrenn hann vann sítt einasta meistaraheiti við Bayern í 2023.
Sum enskur landsliðsvenjari er hann sameindur við millum annað álopsstjørnuna og liðskiparan Harry Kane.
Undir leiðsluni hjá Tuchel skoraði Kane heili 44 mál í 45 dystum í fyrsta kappingarári sínum fyri Bayern München seinasta kappingarár, og Bayer Leverkusen fór avstað við meistaraheitinum.
Manslandsliðið hjá Onglandi vann sítt einasta stóra heiti higartil í HM á heimavølli í 1966.
Seinast hevur tó verið ein bati við tveimum taptum EM-finalum undir leiðsluni hjá Southgate.
/Ritzau/
