Útisetin hesaferð: Jóhanna Reginsdóttir av Steinum

Eg kom til Onglands í 2001. Tað var so, at eg hevði verið úti í heimi og fjakka, og ætlaði at ferðast enn meir. Tískil fór eg til London. Her ætlaði eg at vinna mær pening, soleiðis at hevði ráð at ferðast víðari, men eg sá beinanvegin, at hetta ikki letur seg gera. Hetta tí, London er eitt sera dýrt stað at vera. Eg haldi eisini at eg fekk “The London Bug”. Tá ið tú merkir og sær London, verð­ur tú beinanvegin fangað. Her er sera spennandi at vera, og býurin inniheldur so nógv ym­iskt, at tú ongantíð noyðist at keða teg.
Hvat tekst tú við nú?
Eg gangi á Central Saint Mart­ins College of Art and De­sign. Hetta er eitt stórt un­i­ver­s­itet, sum liggur spjatt yv­ir stóran part av London. Vit eru nakrir føroyingar sum ganga her, men vit síggjast ikki so nógv, av tí at universitetið er so stórt. Her læri eg til snið­geva í binding.
Tað er ikki so, at vit bara læra at binda siðbundnar troyggj­ur og tílíkt. Nógv av tí, sum eg bindi og sniðgevi, eru ný­skap­andi pløgg og annað. Eg bindi nógv til mótasýningar her í London, men hetta er altíð tor­ført at selja, tí støddirnar eru so løgnar. Tað er so, at tá ið tú ger klæði til eina mót­a­sýning í London, skalt tú gera klæðini til modellir. Og hes­ar modellir eru so langar og klænar, at vanlig fólk ofta slett­is ikki passa klæðini. Eg havi havt okkurt til sølu í Føroyum, men skilji á lagnum, at ongin pass­ar klæðini. Tá gerst tað ofta torført at selja vøruna
Hvussu er við málinum – dugir tú lokala málið?
Tað er ongin trupulleiki. Eg byrjaði beinanvegin at ar­beiða í einari barr, og her lærdi eg beinanvegin málið. Ikki tí, føroyingar eru sera væl fyri í enskum málið. Vit eru so heppin, at vit duga fleiri mál, og hetta kemur okkum til góðar úti í heimi. Her eru eis­ini nógvir danir, sviar og norð­menn, og tað er sera hent, at vit duga at samskifta við tey eis­ini.
Málið er so inngrógvið nú, at eg droymi á enskum. Hetta vitn­ar um, at tað fellir mær heilt natúrligt.
Hvat dámar tær í Onglandi?
Eg haldi at tað er heilt hvør sítt, at tosa um London og Ong­land. Eg elski at búleikast her í London. Býurin broytist alla tíðina, og her eru so nógv fólk­a­sløg. Ferðin í býnum er heilt øðr­v­­ísi frá tí, sum vit kenna úr Før­oyum.
Hvussu er mentanin í Onglandi? – Lík­ist hon tí Føroysku?
Aft­ur her, er tað púr­asta hvør sítt at tosa um Ongland og London. Eg veit satt at siga ikki, hvat ið eyð­kennur ensku mentanina, tí eg havi bara búleikast her í bý­num. Eg haldi at mentanin í Lond­on er ein vavgreytur av øll­um ymiskum mentanum. Her búgva jú fólk úr øllum heim­inum, og hetta merkir ment­an­ina. Í býnum búgva umleið 10 mill­i­ónir fólk.
Haldi at ein kann siga, at livistøðið er nakað lægri í Lond­on enn í Føroyum. Minstalønin er rættiliga lág, og London er ein tann dýrasti býurin í heim­i­num. Tað er sera dýrt at leiga eina íbúð her, men matur og ann­að er ikki so dýrt.
Hvussu er við yvirgangi? Er hetta nak­að sum tú hugsar um í ger­and­is­deg­num?
Ikki beinleiðis. Men fólk her eru enn merkt av bumbunum tann 7. juli í fjør. Eg royni ikki at ferðast umvegis und­ir­grundina, men hetta er torført, tí at býurin er so stór­ur. Men um eg síggi eina í­trótt­ar­tasku liggja einsamalla, so sigi eg tað beinanvegin við myndugleikarnar. Soleiðis kann man siga, at henda ósjónliga hótt­anin alla tíðina liggur í bak­høvd­i­num.
Hvussu er maturin í Onglandi?
Her er sera nógvur ymiskur mat­ur. Útboðið er stórt og fjøl­broytt, og tú kanst altíð finna eitthvørt forkunnugt at eta. Eg plagi at keypa inn, men tað er ikki altíð, at eg keypi breyð og eplir heim við. Eg plagi at keypa nógv grønmeti, og nógvan fisk. Tað er ólógligt hjá ferðafólkið at innflyta mat til Onglands, og tískil fái eg ongan føroyskan mat her.
Hvussu er veðrið í Onglandi?
Tey siga, at her er so vátt og grátt, men hetta havi eg slettis ikki upplivað. Her er heitt um summ­arið, og ikki so kalt um vet­ur­in.
Hevur tú ætlanir at flyta heimaftur til Føroya?
Eg havi funnið mína hill. Eg eri vís í, at eg altíð fari at takast við sniðgeving; tað er hetta eg brenni fyri. Men eg kann ímynda mær, at tað er lættari at liva av hesum í London enn á Argjum. Tískil rokni eg ikki við, at eg flyti heim fyribils.

Fakta um Jóhonnu:
Navn: Jóhanna Reg­ins­dótt­ir av Steinum
Fødd: 10.10.1980
Føðistaður: Tórshavn
Besti matur:
Føroyskur: Náti
Útlendskur: Tailendskur matur
Útbúgving: Central Saint Martins College of Art and Design
Starv: Lesandi
Motto: Onki motto