Stjórin í Sjóvinnustýrinum, Tommy Petersen, hevur nú sagt seg úr starvið. Orsøkin er, at um ársskiftið skal hann taka við sum seniorráðgevari hjá Danida í Ramallah í Palestina.
Tommy Petersen hevur í góð 4 ár røkt starvið sum stjóri, fyrst á FAS og Skipaskráseting Føroya og síðani eisini á Skipaeftirlitinum, ella Sjóvinnustýrinum, sum samanløgdu stovnarnir nú eita.
Tommy Petersen sigur um Sjóvinnustýrið: Farið er siglingarklárt kósin er sett. Við einum góðum starvsfólkaliði og øðrum góðum fólkum hava vit fyribils nátt málunum, ið vit settu okkum, nevniliga:
- at økja um flotan í altjóða skipaskrásetingini FAS
- at leggja skipaskrásetingarnar og Skipaeftirlitið saman
- at røkka uppá Hvíta Lista hjá Paris MoU
- at IMO-auditera føroysku umsitingina, ið varðar av sjóvinnu
- at ISO-góðkenna Sjóvinnustýrið
Tí heldur hann, at tíðin nú er búgvin at lata nýggjar kreftir taka yvir
Sum ráðgevari hjá Danida í Ramallah, skal hann veita stjórnini í Palestina ráð og vegleiðing í teirra stremban at skipa lands- og kommunu-umsitingina, sigur hann.
