Landssjúkrahúsið
Leiðslan á Landssjúkrahúsinum vil ikki bakka fyri trýsti.
Spurningurin um, hvussu nógv starvsfólk skulu vera á B 6 á Landssjúkrahúsinum er eisini ein spurningur um prinsipp.
Av teimum 23 sjúkrasystrunum á B 6 hava nú 18 sagt seg úr starvi og tær fara á nýggjárinum.
Tað einasta, sum kundi fáa tær til at taka uppsagnirnar aftur, var, at fleiri starvsfólk vórðu sett á deildini, tí tær mettu, at arbeiðsbyrðan var ov tung.
Hinvegin sigur leiðslan, at afturímóti líknandi deildum á sjúkrahúsum í Danmark er B 6 miðalgott mannað.
Samstundis sigur hon, at á líknandi deildum á donskum sjúkrahúsum eru í miðal eini 50-60 % av sjúklingunum tungir, røktarkrevjandi sjúklingar og tað er meiri enn tað eru á B 6, ella í hvussu so er, er tað ikki minni.
Men stríðið um B 6 er eisini eitt prinsippmál.
Marin Vang, røktarfakligur leiðari á Landssjúkrahúsinum, sigur, at leiðslan á Landssjúkrahúsinum vil ikki geva seg fyri trýsti.
Leiðslan óttast, at fáa sjúkrasystrarnar á B 6 eitt úrslit burturúr at leggja trýst á leiðsluna á hendan hátt, fara aðrar deildir at gera tað sama.
Hon sigur, at ein týðandi orsøk til, at leiðslan ikki vil ganga krøvunum hjá sjúkrasystrunum á møti, er, at hon stúrir fyri, at hesin hátturin at leggja trýst á leiðsluna fer at breiða seg til aðrar deildir eisini og so kann leiðslan skjótt missa tamarhaldið á støðuni.
Tí vil leiðslan ikki geva eftir fyri trýsti av hesum slagnum, sigur hon.
