Næmingar á Ítróttaháskúlanum í Suðuroynni sleppa at royna ymiskt spennandi, ið eisini er við til at fáa tey at kenna síni mørk, ella at flyta egin mørk.
Millum annað eru gonguturar í fjøllunum, klintring og ikki minst havsvimjing og kajakrógving millum mongu spennandi tilboðini á tímatalvuni.
Eitt, sum hevur verið afturvendandi á skránni er, at tyrlan er til taks, so næmingarnir har fáa onkra spennandi avbjóðing.
Í morgun sást tyrla flúgva yvir Vágsfirði. Løtu seinni sást hon sveima yvir stóra grótkastinum, ella pierinum, sum gongur út á Vágsfjørð. Har sást, at fólk stóð undir, og síðani sást, at fólk vórðu tikin upp í sveimandi tyrluna, ella drigin upp.
Hetta vóru næmingar á Ítróttaháskúlanum, ið fingu hesa uppliving, tá tey vóru við í eini royndarbjarging.
Yvir 30 næmingar eru á heystskeiðinum á Ítróttaháskúlanum hesaferð, og koma teir úr øllum Føroyum, umframt úr øðrum londum.
Myndir:Jóni Brandsson Christiansen
