Ítróttur og fótbóltur

Marin Katrina Frýdal, býráðslimur í Tórshavnar býráð fyri Tjóðveldi
-----
Havi hug at gera við­merkingar til kjakið um fótbólt í Hoyvík, sum var í bløðunum beint undan páskum.
Tað er gleðiligt at síggja, at bæði andstøðuleiðarin Sjúrð­ur Olsen, og borgarstjórin, Heð­in Mortensen, nú eisini tykjast at ásanna tað, sum eg gjørdi býráðslimum greitt, tá ið staðseting av fót­bólts­vølli í Hoyvík var til um­røðu fyri júst einum ári síðani, nevniliga, at tað er skila­leyst at gera ein fót­bólts­vøll á einum so veður­hørð­um staði, sum í Hoyvíks­hag­anum. Staðið liggur ov høgt, og vindurin er støðugur. Tað einasta rætta er at gera eina fótbóltshøll, og hetta eru eisini so nógv betur út­givn­ar skattakrónur. Tí gleðist eg sera nógv um, at einki illa umhugsað prosjekt er far­ið í gongd og at somu býráðs­limir, ið talaðu mær ímóti fyri einum ári síðani, nú tykj­ast at hava hugsað seg gjøll­ari um. Takk skulu teir hava fyri tað.
Eg hevði lesarabræv í bløð­unum 4. mai í fjørð við yvirskriftini, “Ítróttur er annað enn fótbóltur” um sama evni. Har eg um­framt hettar citat úr lesara­bræv­inum: “Tað er púra burtur við at gera ein uttandura leikvøll á eitt so ábært og harðbalið stað, sum í Hoyvíkshaganum.......... ein­asta og skilabesta avgerðin er at byggja eina fótbóltshøll í Hoyvíkshaganum”, eisini vísti á týdningin av, at aðrar ítróttargreinar eisini verða raðfestar frammarlaga.
Skjøtul er nú settur á at betra um korini innan fleiri ítróttargreinar s.s. hjá teimum sum spæla golf, hjá teimum sum svimja (antin á landi og/ella á sjógvi) og teimum sum súkkla, ganga, ríða ella renna úti í guds fríðu náttúru.

Sjósvimjarar
Í næstum fáa sjósvimjarar betri umstøður í Sandagerði, har ein svimjibrúgv verður gjørd. Í fyrstu atløgu verða eisini gjørd wc, skiftirúm og brúsa. Seinni verður vónandi eisini ein sauna útvegað til sjósvimjararnar.

Golf
Loksins er eydnast at fáa golf í fremstu røð innan ítrótt­ar­raðfestingina, og nú hava flest allir býráðslimir ásannað, at ítróttagreinin golf skal verða eitt sjálvsagt tilboð í kommununi. Tað hevur tíverri gingið øgiliga striltið at fáa eigara/jarðar­viðurskiftini tillagað soleiðis at farast kann í gongd, men nú tykist ljós at vera fyri framman.

Svimjihylur
At betra um svimjium­støð­urnar, bæði til kappsvimjarar, barnafamiljur, rørslutarnað, motiónistar og pensjónistar, er eisini sett á dagsskránna. Endamálið er at finna ta bestu loysnina, og ein av av­bjóðingunum verður upp­hitingin, ið sjálvsagt skal vera frá varandi orkukeldum.

Súkkling, ríðing, renning, gongufólk og hundar
Fleiri súkklubreytir eru gjørd­ar síðstu árini, bæði í sam­band við nýgerð av vegum og í samband við dagføring av eldri vegum, og enn fleiri verða gjørdar í næstum. Eis­ini er vaksið um netverkið av gongu­leiðum og gøtum, har høvi er hjá borgarum at røra seg í bilfríum um­hvørvi. Somuleiðis er lagt aftr­at av teimum gøtun­um, ið reiðfólkinum og fjalla­súkklu­fólk­inum dáma at ferð­ast á. Hesar gøtuskipanir verða alsamt útbygdar og hjúklað verður um fleiri náttúru­økir til gleði fyri allar borgarar, bæði barnafamiljur, rørslu­tarnað, gomul og ung. Hunda­eigarar eru ein alsamt vaks­andi skari, og økir í náttúruni eiga at verða løgd av til teirra og skipað soleiðis, at pláss verður fyri bæði teimum sum dáma hundar, og teimum ið dáma teir minni væl.
Kappróður, bogaskjóting, skoyting, fimleikur, hond­bóltur v.m.
Bert fyri at nevna nakr­ar, ið eiga at fáa betri um­støð­ur og at koma við á rað­festigarlistan um ítrótt í kommununi. Jú, vist er ítróttur meira enn bara fót­bóltur, hóast at fótbóltur hev­ur ómetaliga stóra rúmd mill­um føroyingar.
Men latið okkum standa saman um at gera heildar­loysnir, varandi loysnir og framtíðar loysnir, sum eru til gleði og gagns fyri allar borg­arar, og latið okkum býta skattakrónurnar, ið til­lut­aðar verða ítróttinum, javnt millum allar ítróttar­grein­arnar.