Amerikanski forsetin, Donald Trump, hevur sent brøv um hægri toll til sjey lond afturat.
Hetta skrivar hann á sosiala miðli sínum, Truth Social.
Sambært brævinum verður frá 1. august ein tollur uppá 30 prosent afturat lagdur á vørur úr Sri Lanka, Algeria, Irak og Libya, sum verða innfluttar til USA.
Vørur úr Moldova og Brunei verða álagdar 25 prosent av tolli afturat, meðan vørur úr Filipsoyggjunum verða álagdar 20 prosent av tolli.
Tað veit Reuters at siga frá.
Týskvøldið danska tíð boðaði Trump frá, at hann "helst" var "tveir dagar" burtur frá at senda eitt líknandi bræv til ES.
Fyrr mikudagin segði ES-handilskommissarin, Maros Sefcovic, at ES og USA arbeiða nógv við eini prinsipiellari avtalu um toll.
Tað kann koma uppá pláss "innan komandi dagarnar", sigur Sefcovic, sum er høvuðssamráðingarmaður í ES-nevndini um eina framtíðar avtalu við USA.
Fyrst í apríl setti Trump tíggju prosent toll á so at siga allar handilspartarnar hjá USA.
Samstundis avdúkaði hann, hvønn toll hann ætlaði at leggja á fleiri lond.
Men hann valdi at seta tey í bíðistøðu í tríggjar mánaðir og hevur síðani útsett freistina fyri, nær eykagjøldini koma í gildi frá 9. juli til 1. august.
Hetta hevur givið ES og øðrum samstarvsfeløgum eyka tíð at samráðast.
Týsdagin skrivaði Trump á Truth Social, at hann fer at halda seg til freistina 1. august.
– Tað verða ikki fleiri leingingar av freistini, segði hann.
Mánadagin vísti hann fyrstu av sokallaðu tollbrøvunum á Truth Social.
Tey vóru ætlað leiðarunum í 14 londum, harímillum Suðurkorea og Japan.
Tað varð sagt, at Trump fer at seta 25 prosent toll á allar vørur úr teimum báðum londunum frá 1. august.
/Ritzau/
