Tíðindaskriv:
Fyrilesturin verður á Hotel Føroyum, og her fært tú eitt sjaldsamt og áhugavert innlit í trygdarstøðuna hjá Føroyum og Danmark. Í eini tíð við cyberálopum, fake news og vaksandi spenningi í Arktis, standa Føroyar og Grønland mitt í politiska storminum millum eystur og vestur.
Hvussu ávirkar hetta frælsi, virðir og framtíð okkara?
Fyrilesturin er ikki bert um geopolitikk. Lars Findsen, sum í 2022 útgav best-seller bókina ”Spionchefen”, fer somuleiðis at geva eitt serligt innlit í eina av størstu vesturlendsku fregnartænastuskandalunum. Findsen varð handtikin á flogvøllinum í Keypmannahavn í desember 2021, og málið hevur havt stórar politiskar avleiðingar.
Findsen fer at greiða frá sínum upplivingum frá tíðini í varðhaldi í Hillerød fongsli, har hann sat í 71 dagar í kliva 18. Um gerandisdagin handan rimarnar, sínar hugsanir um rættarskipanina og sambandið millum embætisfólk og politikarar.
Somuleiðis um leiklutin hjá miðlunum og tær menniskjaligu avleiðingarnar av at standa mitt í ódnini.
Við síni djúpu vitan um danskar og altjóða fregnartænastur, gevur Lars Findsen áhoyrarum eina sterka, erliga og tankavekjandi frásøgn um, hvussu hóttanir móti Danmark, Grønlandi og Føroyum verða handfarnar – og hvat vit kunnu gera fyri at standa tryggjari í einum ótryggum heimi.
Fyrilesturin verður 18. februar kl. 19:00 (Hotel Føroyar). Atgongumerki kunnu keypast á atgongumerki.fo
