Frystilínuskipið Klakkur, sum brøðurnir, Líggjas og Bethuel Johannesen eiga saman við Kósini, kom hósdagin á fiskileið á Flemish Kap, har eitt annað føroyskt frystilínuskip - Kambur - hevur roynt í nakrar dagar.
Fyrsta føroyska línuskipið, sum fór longu leiðina yvir á Flemish Kap í ár, var Váðasteinur, sum hevur gjørt fyrsta túrin har yviri. Váðasteinur hevði góðan fiskiskap, og tað hevur Kambur eisini havt, síðan teir byrjaðu fiskiskap.
Tá Sosialurin hevði Bethuel Johannesen í telefonini fríggjadagin, segði hann, at teir júst vóru í holt við at draga fyrstu setuna.
- Her er illveður í dag, og higartil hevur lítið av fiski verið á línuni, umframt at fiskurin hevur verið smáttfallandi.
Bethuel ivast tó onga løtu í, at Klakkur fer at koma í fisk, og kanska var tað veðrið, sum órógvaði henda fyrsta dagin.
Skiparin á frystilínuskipinum Kambi, Mortan Mortensen, segði við Rás2 hósdagin, at fiskiskapurin higartil hevur verið góður - og eins góður, og hann var í fjør, tá Kambur gjørdi fleiri ísfiskatúrar har yviri.
Skipari á Klakki henda túrin er Líggjas Johannesen, men hann var niðri á dekkinum, tá Sosialurin hevði Klakk í telefonini.
Bethuel Johannesen segði, at tá teir komu yvir á Flemish Kap hósdagin, høvdu teir onkran pakka við til manningina á Kambi, og tað gekk væl at fáa pakkan yvir.
- Jú, vit eru spentir eftir at vita, hvussu hetta fer at rigga, nú vit eisini eru farnir at frysta, men vit vænta avgjørt, at hetta er ein gongd leið, segði hann.
