Mike Tyson hevur bjóðað Evander Holyfield av. Teir báðir hava tvær hittst í ringinum áður. Báðar ferðir hevur Holyfield vunnið, og tískil hevur Holyfield góðar vónir til dystin móti Tyson, um hann verður til nakað.
- Eg havi smurt hann av tvær ferðir, og eg eri klárur at geva honum enn ein umgang, sigur Evander Holyfield, sambært BT.
Holyfield er í dag 45 ára gamal, men hóast tað er hann framvegis virkin sum boksari. Tyson er 41 ár og hevur ikki boksað síðani 2005.
Fyrstu ferð Tyson og Holyfield hittust var í 1996. Tá vann Holyfield upp á tekniskt knockout í 11. umfari. Árið eftir hittust teir aftur og tá var tað, at Tyson var dømdur at tapa dystin, eftir at hann beyt annað oyra av Holyfield.
- Ein dystur móti Holyfield er tað einasta, sum kann fáa meg aftur í ringin, sigur Mike Tyson, sambært danska blaðnum.
