226 tingfólk atkvøddu fyri uppskotinum, meðan 195 atkvøddu ímóti. Sambært Reuters atkvøddu 18 republikanarar saman við demokratunum, hóast leiðslan í Republikanska flokkinum og forsetin, Donald Trump, hava verið ímóti.
Lógaruppskotið, sum hevur ligið í fleiri mánaðir, skal veita meira enn eina milliard dollarar til trygd og enduruppbygging í Ukraina. Harumframt skal Ukraina fáa møguleika at taka eitt lán upp á átta milliardir dollarar.
Reuters metir, at atkvøðugreiðslan vísir, at fleiri republikanarar eru sinnaðir at ganga ímóti floksleiðsluni í málinum um Ukraina.
Kortini er framtíðin hjá uppskotinum óviss. Tað skal eisini samtykkjast í Senatinum, har republikanski meirilutin higartil hevur forðað fyri atkvøðugreiðslum um nýggj revsitiltøk móti Russlandi.
Verður uppskotið samtykt í Senatinum, verður væntandi, at Donald Trump fer at leggja veto ímóti tí.
Stuðulin til Ukraina hevur verið eitt stríðsmál í amerikonskum politikki, síðani Russland leyp á landið í 2022. Eftir at Trump aftur tók við forsetaembætinum í januar 2025, eru fleiri republikanarar vorðnir meira varnir við stuðlinum til Ukraina.
Kelda: Ritzau/Reuters/AP.
