Marine Harvest er farið undir eina munandi útbygging av smoltstøðini á Hellunum. Framleiðsluorkan verður væl meira enn tvífaldað, tá útbyggingin er liðug.
Hans Jákup Mikkelsen, stjóri á Marine Harvest í Føroyum, sigur við heimasíðuna hjá Fiskaaling, at útbyggingin fevnir um 8.000 rúmmetrar í mun til teir 4.700 rúmmetrarnar, sum eru í løtuni.
- Endamálið er at fáa størri smolt at seta út og at hava fiskin styttri í sjónum. Í dag er miðalvektin á smoltinum, sum fer av støðini, umleið 140 gram. Ætlandi skal vektin økjast til 650 gram, tá útbyggingin er liðug. Eisini fer talið at økjast munandi, sigur hann.
Alt verður størri við hesi útbyggingini. Ikki bara hølini. Eitt nú verður tíðin, sum smoltini vera á støðini, longd við umleið einum hálvum ári.
- Hetta ger so aftur, at fiskurin verður styttri í sjónum. Vónin er at vinna tað aftur við færri vansum av ymiskum slag, eitt nú við minni lús og færri sjúkum, og tí, sum kann fylgja við at hava fisk gangandi í ringunum á sjónum.
Hans Jákup Mikkelsen sigur, at hendan útbyggingin er tann fyrsta hjá Marine Harvest-samtakinum yvirhøvur, sum miðar eftir at fáa so stóran fisk. Útbyggingin fer at kosta 100 milliónir krónur, sigur hann.
Á aliráðstevnuni herfyri varð kunngjørt, at smoltstøðin á Hellunum var tann smoltstøðin í landinum, sum hevði best úrslit farna árið. Tær báðar sjógvalistøðirnar, sum høvdu besta og næstbesta úrslitið, høvdu báðar fingið smolt av Hellunum.
